Маңғыстаулық полицейлер қаза тапқан әріптестерін еске алды

Қазақстан полициясының 30 жылдық мерекесі қарсаңында маңғыстаулық полицейлер 23 жасында қызмет бабында қаза тапқан әріптестері Нұрболат Елеусіновті еске алды, деп хабарлайды mangystaumedia.kz МО ПД баспасөз қызметіне сілтеме жасап.

Елеусінов Нұрболат Қуанғалиұлы – Маңғыстау облысы ПД Жылдам қимылдайтын арнайы жасағында офицер қызметінде болған.

Маңғыстаулық полицейлер алдымен Нұрболаттың ата-анасы, жақындарымен бірге зират басына барып, құран бағыштады. Қыршын қиылған жас офицердің бейітінің басына жиналғандар көзге жас алып, жаны жайдары жанның жарқын естеліктерін еске алды.

Одан бөлек, Нұрболаттың құрметіне ведомстваның “Намыс” демалыс орнында күш құрылымдары арасында еске алуға арналған спорт түрлерінен чемпионат өткізілді. Бұл чемпионат «шағын-футбол», «арқан тартыс» және «қол күресі» секілді кезеңдерден тұрды. Спорттық шарада ПД Арнайы және жұмылдыру даярлық басқармасы, ПД Оқу жаттығу ротасы, ПД Жылдам қимылдайтын арнайы жасағы, Ұлттық қауіпсіздік комитеті шекара қызметінің арнайы мақсаттағы жасағы, Ұлттық ұлан әскери бөлімі “Бүркіт” арнайы мақсаттағы жасағы, Ұлттық қауіпсіздік комитеті “А” арнайы мақсаттағы қызметі және Нұрболаттың достары мен інілерінен құралған командалар бақ сынасты.

Іс-шараның ашылу салтанатында ПД бастығының орынбасары Қандарбек Бахтыгереев, Ішкі істер органдарының ардагері запастағы полковник Мұхсин Дүйсенғалиев және Нұрболаттың анасы Айжан Гайсиевна сөз сөйледі.

- Баламызды ұмытпай, осылай еске алып үлкен іс-шара ұйымдастырып жатқан Полиция департаменті басшылығы мен Нұрболатпен қызметтес болған әріптестеріне шексіз алғысымызды білдіреміз. Қызметтеріңіз өте ауыр әрі қиын, тек аман болып, еңбекте жемісті болыңыздар,- деді алғысы мен тілегін жеткізген Нұрболаттың анасы.

Көптің тамашалауымен ойын тартысты өтіп, әр ойынның жеңімпазы анықталды. Шағын-футбол ашық турнирінде Нұрболаттың достарының командасы бірінші орынды, інілері - екінші орынды және Ұлттық қауіпсіздік комитеті шекара қызметінің арнайы мақсаттағы жасағы үшінші орынды иеленді. Жүлделі орындардан бөлек, қатысушылар “Үздік қорғаушы”, “Үздік қақпашы” және “Үздік шабуылшы” номинацияларымен де марапатталды.

“Қол күресінен” бірінші орынды ПД ЖҚАЖ инспекторы Н.Тұрланбаев иеленсе, “Арқан тартыста” ПД ЖҚАЖ командасы алға шықты.

Барлық жеңімпаздарға Нұрболаттың суретімен дайындалған арнайы грамоталар, медаль, кубок және сыйлықтар табыс етілді. Сондай-ақ, батырдың анасына да сый-құрмет көрсетіліп, ПД бастығының атынан алғыс хат пен сыйлықтар табысталды.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.