Ақтаудағы жағымсыз иістің себебі анықталды

Маңғыстау облыстық экология департаментінің мамандары тұрғындардың шағымы негізінде атмосфералық ауаға жедел мониторинг жүргізді, - деп хабарлайды mangystaumedia.kz сайты.

Мониторинг жұмыстары Басқұдық ауылына қарасты канал бойына, «Қошқар-Ата» қалдық қоймасының қасындағы ескі полигон және өндірістік аумақтарына жүргізілді. Облыстық экология департаменті баспасөз қызметінің мәліметінше, ластану ошағы ескі полигон аумағында анықталды. Атмосфералық ауадан алынған сынама күйе көрсеткішінің 14,652 мг/м3 (0,150 ШРК), яғни 97.7 есе шекті концентрациядан артуын анықтады.

Куәгерлердің айтуынша, қара темір іздеушілер ескі полигонды қопсытып, техникамен ашу салдарынан ауада жағымсыз иіс пен өрт болған.

- Сонымен қатар Атамекен селосының өндірістік аумағында орналасқан жеке шаруашылыққа арналған аумақтың атмосфералық ауасынан көміртегі тотығы көрсеткіші 5,11 мг/м3 (5,0 ШРК), яғни 1,03 есе шекті концентрациядан артуын көрсетті. Өз кезегінде департамент мамандары ластану ошағының тиесілі иесін анықтап, заң аясында шара қолдануды жалғастырады, - деді облыстық экология департаменті мамандары.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.