Өнер сапары шілде айына дейін жалғасады

Маңғыстау өнерпаздарының 26 сәуірде басталған өнер сапары шілде айынан дейін жалғасатын болады. Бұл туралы Қоғамдық коммуникация орталығында өткен брифингте облыстық қуыршақ театрының директоры Фарида Атакеева айтты, - деп хабарлайды mangystaumedia.kz.

Спикердің айтуынша, облыстық қуыршақ театрының гастрольдік сапары ауыл балаларын қиял-ғажайып ертегі әлеміне жетелеп, сахна өнеріне баулуды көздейді.

- Біз кішкентай көрермендерімізді әрдайым қуантуға дайынбыз. Әрине қуыршақ қойылымдарын сахналау толағай еңбекті талап етеді. Қуыршақ қимылы-әрекеті арқылы көрермен ертегі әлеміне саяхат жасайды. Қуыршақтар театры балаларға жақсы көңіл-күй сыйлайды деген ойдамын,-деді Фарида Атакеева.

Мұрат Өскінбаев атындағы Маңғыстау облыстық филармониясының концерттер бойынша менеджері Бауыржан Сатыбалдин брифинг барысында гастрольдік сапар жайлы ақпаратпен бөлісті.

- Халқымыздың мәдени мол мұрасы - ұлтымыздың жәдігері. Театр өнерпаздары сахналық қойылымдарды көрермен назарына ұсынады. Біздің мақсат— Адайдың 7 қайқысының өнерін өсиеттеу, ата-бабамыз аманат еткен ұлттық туындыларымызды келешек ұрпаққа насихаттау,-деді Бауыржан Сатыбалдин.

Айта кетейік, 26 сәуір күні облыстық қуыршақ театрының, Мұрат Өскінбаев атындағы Маңғыстау облыстық филармониясының және Н. Жантөрин атындағы Маңғыстау облыстық музыкалық драма театрының өңірлік өнер сапары басталған еді.

Қойылым мен концерттердің мамыр айындағы кестесі:

14 мамыр күні Басқұдық ауылының мәдениет үйінде сағат 16:00-де «Сиқырлы сандық» қойылымы;

15 мамыр Жетібай ауылының мәдениет үйінде сағат 16:00-де «Үйшік» қойылымы;

15 мамыр Қызылтөбе ауылының мәдениет үйінде сағат 19:00-де М. Өскінбаев атындағы Маңғыстау облыстық филармониясының Абыл Тарақұлы атындағы ұлт-аспаптар оркестрінің концерті;

16 мамыр Құрық ауылының мәдениет үйінде сағат 19:00-де Н. Жантөрин атындағы Маңғыстау облыстық музыкалық драма театрының «Көке» премьерасы;

17 мамыр Маңғыстау ауылының Ф. Оңғарсынова атындағы мәдениет үйінде сағат 19:00-де М. Өскінбаев атындағы Маңғыстау облыстық филармониясы - Абыл Тарақұлы атындағы ұлт-аспаптар оркестрінің концерті;

23 мамыр Таушық ауылының мәдениет үйінде 19:00- де М. Өскінбаев атындағы Маңғыстау облыстық филармониясы - «Ақжарма» фольклорлық ансамблінің концерті;

28 мамыр Ақшұқыр ауылының мәдениет үйінде 19:00- де, М. Өскінбаев атындағы Маңғыстау облыстық филармониясы - «Ақжарма» фольклорлық ансамблінің концерті өтеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.