Ақтауда оқитын нигериялық студент «Дайдидау» әнін шырқады

Ш.Есенов атындағы университеттің ұйымдастыруымен өткен республикалық «Yessenov Fest - 2022» студенттік фестивалі аясында өнер көрсеткен Ифунания Маризитта Анашолли Димаш Құдайбергеннің «Дайдидау» әнін шырқады, -деп хабарлайды mangystaumedia.kz сайты ҚКО сілтеме жасап.

Маризитта Анашолли «Жастар шығармашылығы» байқауында вокал жанры бойынша қатысты. Оның айтуынша, әнді «Студенттік вокал» үйірмесінің жетекшісі Макина Гүлнәрамен бірлесіп таңдаған. Қазылар алқасы африкалық қыздың өнеріне тәнті болып, алғыс хат тапсырды.

Маризитта Анашолли Ш.Есенов атындағы Каспий инжиниринг және технологиялар университетінде «Компьютер инжиниринг және ақпарат технологиясы» мамандығының 1-курсында оқиды. Ол Қазақстан туралы ғаламтордан біліп, қызығушылық танытқан.

- Отбасымда бір ұл, екі қыз және ата-анам бар. Әкем кәсіпкер, анамның өз мейрамханасы бар, әпкем стилист, ал ағам компьютер технигі. Алғашқы кезде олар Қазақстанға кетуіме қарсы болды. Бірақ қазір ойын өзгертті, Қазақстанға қыдырып келуді жоспарлайды. Біз бейнебайланыс арқылы ұдайы сөйлесіп тұрамыз. Университетте өткен фестивальда өнер көрсеттім және ол маған қатты ұнады-дейді нигериялық бойжеткен.

Маризитта өнер көрсеткен «Жастар шығармашылығы» байқауы «Аспапта ойнау», «Дәстүрлі ән», «Эстрадалық вокал», «Хореография» номинациялары бойынша өтті.

Негізгі мақсаты - жастардың рухани мәдениеті мен шығармашылығын дамыту, шығармашыл жастар арасында тәжірибе алмасу мүмкіндігін қалыптастыру, дарынды орындаушылар мен жас таланттарды айқындау және қолдау,- дейді ұйымдастырушылар.

«Жастар шығармашылығы» байқауында «Аспапта ойнау» номинациясы бойынша бас жүлдені Маңғыстау өнер колледжінің
«Науаи» фольклорлық ансамблі алса, І орынды Маңғыстау өнер колледжінің студенті Лашын Қуанғали иемденді. ІІ орынды Yessenov University-нен «Жас өрен» домбырашылар ансамблі алса, ІІІ орынды Yessenov University-нен Данилова Карина иемденді. Ал Маңғыстау өнер колледжі студенті Ақнұр Аманғалиқызы мен Маңғыстау өнер колледжі студенті Ұлданай Шоңай лауреат атанды.

«Дәстүрлі ән» номинациясы бойынша бас жүлдені Индер балалар өнер мектебінің түлегі Қарақат Жамбылова иеленсе,
І орынды Ф.Оңғарсынова атындағы Мәдениет үйінің өнерпазы Меруерт Данатар алды. ІІ орынды Қызылтөбе ауылының орта мектебінің оқушысы Жадыра Дүйсенбаева алды. ІІІ орын Yessenov University-нен Сұңғат Қонақбаевқа бұйырды.

«Эстрадалық вокал» номинациясы бойынша бас жүлдені Yessenov University-нен Алина Аятова алса, І орынды Yessenov University-нен Раулана Берікбаева иемденді.
ІІ орынға Yessenov University-нен Қуанышбек Жеткізген жайғасса,
ІІІ орынды Ақшұқыр мектеп лицейінің Құрман Кенжеғали жеңіп алды. Ал Ақтаудағы «Оқушы орталығының» «Nur Band» ансамблі лауреат атанды.

«Хореография» номинациясы бойынша бас жүлдені Маңғыстау өнер колледжінің студенттері «Айша қыз» би ансамблі алды. І орынды Yessenov University студенті Гүлдана Төлегенова иеленді. Ал ІІ орынды Маңғыстау өнер колледжінен Ақбота Мазиева жеңіп алды.

ІІІ орынға Yessenov University-нің «Ақкербез» би ансамблі мен Маңғыстау өнер колледжі «БИС» би ансамблі жайғасты.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.