Нұрлан Ноғаевтың қатысуымен «Жыр жүйрігі - Қашаған» кітабының тұсаукесері болды, деп хабарлайды mangystaumedia.kz
Шараны Ш.Есенов атындағы университет ұйымдастырып, оқу орнының бас ғимаратында өткізді. Университеттің ректоры Берік Ахметов өзі жүргізіп отырды.
Облыс әкімі ұрпақтар сабақтастығын үзіп алмау үшін, рухани адаспау үшін мұндай кітаптар шығып тұруы керегін айтты.
- Осы жиынға әр буын өкілі, әртүрлі мамандық иелері әр жерден арнайылап келіп отырмыз. Басымызды бір жерге қосып, бір ниетке ұйытып отырған кім деп, не деп ойлайсыздар? Әрине бұл – осыдан 180 жыл бұрын өмірге келсе де, елдің есінен еш кетпеген Қашаған атамыз және оның мағыналы мұрасы, - деді Нұрлан Ноғаев.
Сонымен қатар, Светқали Нұржан, Өмірзақ Озғанбаев, Тұрсынғали Көшенов сынды азаматтар Қашаған Күржіманұлының өмір жолына, шығармашылығына, оның зерттелуіне қатысты салмақты мәліметтерді бөлісіп, жинаққа құтты болсын айтты.
Қашаған ақынның бұған дейін де «Топан», «Қайыртпай кеткен Қашаған», т.б. біраз кітаптары басылған. Бұл жинақтың олардан ерекшелігі – бұрын бөлек-бөлек шыққан кітаптардың бәрі осы кітапқа енді. Сонымен қатар, бұрын жария болмаған тың мәліметтер, ғалымдардың жырау шығармашылығын академиялық форматта жан-жақты талдаған соңғы ғылыми еңбектер кірді мұнда.
Жинақты құрастырған – қазақ тілі мен әдебиеті магистрі, РһD доктарант, Қазақстан жазушылар одағының мүшесі, «Қазақ филологиясы» кафедрасының аға оқытушысы, «Өлкетану» ғылыми-зерттеу орталығының меңгерушісі Жайлау Бақтыбай Сәрсенбайұлы.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
