Менің таңдауым - ҚазҰУ

Қазақстан бүгінгі таңда сапалы білімімен көзге түскен елдердің бірі болып табылады.Президентіміз Қасым Жомарт Тоқаев білімге көп көңіл бөлуде. Біз оны салынып жатқан әлемдік стандартқа сай түрлі мектептер мен жоғарғы оқу орындарынан байқаймыз. Сондай университеттердің бірі Әл-Фараби атындағы қазақ ұлттық университеті. ҚазҰУ әлемнің ең үздік 300 университеттерінің қатарында. Ғылыми зерттеулер мен әдістемелерді жүргізуде жоғары деңгейдегі технологияларды пайдаланатын, оны қоғамда және экономикада ұтымды жүзеге асыратын алдыңғы қатарлы заманауи ЖОО болып табылады. Болашақта ҚазҰУ тек республикалық ғана емес, халықаралық білім беру орталығына айналмақ.

Қазіргі кезде университетте 13 факультет қызмет атқарады. Әрқайсысында жоғарғы дәрежедегі мамандандырылған оқытушылар мен профессорлер білім беруде. Әр факультеттің өзіндік орны мен тарихы бар, бірі екіншісінің орнын баса алмайды және факультеттердің түлеп шыққан түлектері еліміздің әр саласында, шетелдерде қайталанбас маман иелері болып қызмет атқарады. Сонымен қатар негізгі факультеттерден басқа дайындық факультетінде әлемнің түкпір-түкпірінен жиналған шетел азаматтары мемлекеттік тіліміз қазақ тілін уйрену үстінде. Олардың араларында ауған азаматтары, қытайлар, корейлер, түріктер және шетелдерде тұратын өзіміздің қандас бауырларымыз, яғни қазақтар да бар. Осының есебінен біз студенттер шетел азаматтарымен танысып, басқа елдердің мәдениетін танып біліп, оларға өзіміздің елімізді танытамыз. Шығыс тілдерін уйреніп жүрген біздерге, бұл керемет тәжірибе деуге болады. Себебі, олар бізге, біз оларға көмек көрсетеміз. Бұл жайт ҚазҰУ-нің керемет мүмкіндіктерінің бірі болып есептеледі.

Мектеп қабырғасын «Алтын белгімен» бітіргенімде менің алдымда үлкен таңдау тұрды.Ол – мамандық таңдау. Демек,сол мамандықты меңгеріп шығатын университетті таңдау. Көп толғанып, көп ойландым. Ойлана келе ҚазҰУ-ға жететін университет жоқ екеніне көзім жетті. Содан мен, экономика және бизнес жоғары мектебі факультетінің экономика кафедрасының грант иегері атандым. Факультетіміздің әлемнің басқа университеттерімен байланысы өте жақсы дамыған. Факультет оқытушылары мен студенттері ғылыми практикадан өтетін университеттер Үндістанда, Қытайда, Кореяда, Түркияда, Египетте бар.

Университеттің білімі туралы барлығымыз хабардар болдық, енді университеттің студенттік өмірі жайлы айтатын сөз де аз емес. ҚазҰУ қабырғасында әртүрлі ұйымдар жұмыс істейді. Мысалы: «Студенттер сенаты», «Сұңқар» ұйымы, «Көмек» ұйымы т.б.. Бұл ұйымдардың әрқайсысының өзіндік жұмысы мен қызметі бар. Ұйымдар студенттер үшін оқудан тыс қоғамдық өмірге белсене араласуына ықпал тигізеді.

Оқу жылы ішінде университетімізде әр түрлі сайыстар және кештер өтеді. Олардың ең бастылары: «Ана тілі аруы» мен «Жігіт сұлтаны». Бұл республикалық деңгейдегі сайыстар болып табылады. Жалпы айтатын болсақ, ҚазҰУ студенттерінің өмірі қызыққа толы да әсерлі. Әр студенттің жадында қалар мәңгі естеліктер десек қателеспейміз.

Қорытындылай келе, осы Әл-Фараби атындағы Қазақ Ұлттық университетінің, экономика және бизнес жоғары мектебі факультетінің, экономика кафедрасының студенті болғаныма еш өкінбеймін, керісінше мақтан тұтамын.

Ідріс Рзагүл Раушанқызы, 4-курс студенті

Жетекші: Тураров Даурен Рыскулович, э.ғ.к, доцент м.а.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.