«Pizza Pitch»: Ақтауда 20-ға жуық жас IT жобасын ұсынды

Ақтауда жас стартапшыларға арналған «Pizza Pitch» өтті. Онда 20-ға жуық жас түрлі бағыттағы ІТ жобасын ұсынды. Жобаның басым бөлігі медицина мен экология саласына бағытталған, - деп хабарлайды mangystaumedia.kz сайты.

Жобаға қатысушының бірі – Назарбаев зияткерлік мектебінің 11-оқушысы Аслан Бердібай. Ол адам ағзасындағы қанның ұю мөлшерін тез анықтап беретін құрылғыны жобалаған.

- Жобам «Sagyn Blood» деп аталады. Қазір халық арасында қан ұю, жалпы қан аурулары жиілеп кетті. Сондықтан осы жоба арқылы қанның ұю көрсеткішін ерте әрі жедел анықтауға арналған құрылғы жасап шығуды жоспарлап отырмын. Жобаның жоспары 8 ай бұрын жасалған. Жақында 1 млн теңге ұтып, құрылғыға арнайы Arduino, Bluetooth, лэд-экран, датчикті сатып алдық. Жалпы құрылғыға қанды тигізген кезде гемостаз концентрациясын шығарады. Содан кейін Bluetooth арқылы мобильді қосымшаны сынақтан өткізудеміз. Мұнда қанның үш сатысы туралы мәлімет шығады, - дейді жас стартапшы Аслан Бердібай.

Оқушының айтуынша, мұндай жобалар жастарды шабыттандырып, ойға алған бастамаларын жасауға серпін сыйлайды.

Жалпы «Pizza Pitch» жобасы өңірде төртінші рет ұйымдастырылып отыр. «Astana Hub» халықаралық ІТ компаниясының аймақтық өкілі, «Mangystau IТ Hub» жетекшісі Айгерім Мажтайдың айтуынша, негізгі мақсат - жас стартапшылардың талантын ашу, IT саласына қызығушылығын арттыру.

- Шараға қатысушылар медицина, экология және әлеуметтік саладағы стартаптар қорғады. Себебі кез келген салада IT-дың маңызы өте зор. Алдағы уақытта да өңір жастарын шабыттандыру, өнімін IT қауымдастыққа шығару мақсатында шаралар жиі ұйымдастырылады. Аймақтық хабтағы іс-шаралар мен жобаларға Маңғыстау облыстық Цифрлық технологиялар басқармасы тарапынан қолдау бар, - деді «Astana Hub» халықаралық ІТ компаниясының аймақтық өкілі, «Mangystau IТ Hub» жетекшісі Айгерім Мажтай.

Әділқазы алқасының шешімімен 3 стартап жоба үздік атанды. Атап айтқанда, «CutZ» командасы (Назарбаев зияткерлік мектебінің оқушылары) І орын алды, «QazPrint» командасы (Yessenov university магистранты) ІІ орынды иеленді. ІІІ орынды «ResQ» командасы (қала мектептерінің оқушылары) алды. Жеңімпаздар арнайы сыйлықтармен марапатталды.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.