Ақтауда 50 мың оқушыны қамтыған тәуелсіздік сабағы өтті

Ақтауда Назарбаев Зияткерлік мектебінде ел Тәуелсіздігінің 30 жылдық мерейтойына орай «Назарбаев Зияткерлік мектептері» ДББҰ бастамасымен ұйымдастырылған «Тәуелсіздік сабақтары» жобасы аясында ашық сабақ өтті, деп хабарлайды mangystaumedia.kz.

Қазақстан тарихы пәні мұғалімдері Ислам Ұзақбай, Марзия Жеткізгенова және Нұргүл Дүйсеалиеваның жетекшілігімен өткен ашық сабақ «Бейбітшілік пен келісім - Қазақстан тәуелсіздігінің тірегі» тақырыбына арналып, зияткерлер тәуелсіздік жылдарындағы Қазақстанның жеткен жетістіктері мен халықаралық аренадағы маңызды шешімдерін талқыға салды.

«Назарбаев Зияткерлік мектептері» ДББҰ ұйымдастырған «Тәуелсіздік сабақтары» жобасы бір уақытта республика бойынша 50 мыңға жуық оқушы мен ұстаздарды қамтиды. Аталған шараға Маңғыстау облысынан 1 500-ге жуық оқушы мен ұстаздар қатысып, пікірталасқа қатысты.

Ақтау қаласындағы Назарбаев Зияткерлік мектебінің ашық сабағына Маңғыстау облысындағы 38 жетекші мектептен 1 500-ге жуық оқушы мен мұғалім онлайн-трансляция арқылы қатысты. Сабақты өткізудегі біздің мақсатымыз – өскелең ұрпаққа тәуелсіздік бағасын түсіндіріп, халықаралық аренадағы Қазақстанға артылған сенімді, жастарға артылған үмітті көрсету, - дейді мектеп директорының орынбасары Айбар Мурзабеков.

Сабақтың тағы бір ерекшелігі Маңғыстау облысындағы белді басқармалар мен қоғам өкілдерінің бақылаушы ретінде қатысуы Мерекелік сабаққа МО ішкі саясат басқармасының басшысы Аманғали Нұрдаулетов, Маңғыстау облыстық білім басқармасының басшысы Светлана Түлебаева, Ақтау қаласындағы педагогикалық шеберлік орталығының директоры Қатира Боранбаева, Ақтау қалалық білім бөлімінің басшысы Бағдат Тұрғанбаева және бірқатар мектеп директорлары қатысты. Осылайша, келген қонақтар өскелең ұрпақтың ойлары мен үніне құлақ асып, пікірлерін тыңдады.

Сабақ Қазақстанның 2016 жылдан бері Дүниежүзілік діндердің конференциясын алғаш рет өткізуі және мұндай бастаманың маңызы, қазіргі таңдағы проблемаларды шешу жолдарына арналды. Білім ордасының 10 -12 сынып оқушылары өз ойларын ашық білдіріп, сабақты қызу пікірталас алаңына айналдыра білді.

Еліміз 30 жылдың ішінде айтулы жетістіктерге жетті және мұның барлығы бейбітшілік пен өзара ынтымақтастық пен келісімнің арқасы деп білемін. Көшбасшылар мектебінің оқушысы ретінде қоғам белсенділері мен өңір тұрғындарын, өзге мектептердегі оқушыларды қатысу мүмкіндігін ұйымдастырған өте дұрыс деп санаймын. Себебі, жан-жақты қарым-қатынас келісім мен дамудың кепілі, - дейді 12-сынып оқушысы Гүлфайруз Ниялова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.