Бұл туралы Қоғамдық коммуникация орталығында өткен брифингіде Маңғыстау облысы әкімінің орынбасары Гүлмира Қалмұратова мәлім етті, деп хабарлайды mangystaumedia.kz.
Оның айтуынша, қазіргі таңда облыс бойынша коронавирус жұқтырған науқастар саны өткен аймен салыстырғанда 3 есе төмендеген. Сондай-ақ, Г. Қалмұратова өңірдегі қажетті вакцина түрлері тұрғындар үшін толықтай қолжетімді екенін де хабарлады.
«Стационарларда науқас саны тамыз айында 1 000-нан аса адам болса, бүгінгі күні олардың саны 313 адамға дейін, яғни 3 есеге дейін төмендеді. Қазіргі кезде «CoronaVac», «Vero Cell» және «Спутник V» сынды вакцина түрлері азаматтар үшін қолжетімді. Екпе жұмыстары қарқынды түрде жүргізіліп жатыр», - деді Гүлмира Мұратқызы.
Сонымен қатар спикер брифингіде «Ашық» мобильдік қосымшасы туралы айтып өтті. Облыс бойынша «Ashyq» мобильді қосымшасын 2808 объекті пайдаланады. Жалпы карантиндік талаптарды бұзған 30 тұрғынға 1,3 млн теңге көлемінде айыппұл салынды.
Айта кетейік, Маңғыстау облысында бүгінгі таңда 150 436 азамат коронавирусқа қарсы вакцинаның I компонентін алса, 119 146 адам II компонентін салдырған.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
