Маңғыстауда коронавируспен ауырған науқастардың көбеюіне байланысты оттегі баллонына сұраныс арта түсті, деп хабарлайды mangystaumedia.kz.
Бүгінде “Эко Газ Ақтау” мекемесі тәулігіне 550 оттегі баллонын толтырып, Ақтау қаласындағы, Қарақия, Маңғыстау және Түпқараған аудандарындағы стационарларға жөнелтуде. Бұл іске мекеме жұмысшыларымен қатар, Ақтаудың спорт шеберлері де атсалысып жатыр.
Кеше облыс әкімі С.Трұмов ел басына түскен уақытша қиындықты еңсеруге ерікті түрде көмектесіп жатқан азаматтармен жолығып, өңір тұрғындары атынан алғыс айтты.
“Уақытпен санаспай, тәулік бойы кезекпен еңбектеніп жатырсыздар. Алла разы болсын, бауырларыма! Біз барлық қиындықтар мен сынақтарды бірге еңсереміз”, - деді облыс әкімі.
Қазіргі таңда мекеме ауруханалардан түскен сұранысты толық қамтамасыз етіп отыр. Қосымша 600 баллонға дейін бар.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
