Ақтау гарнизонындағы әскери-теңіз базаның әскери қызметшілердің отбасы мүшелерімен жұмысты ұйымдастыру қызметі қарқынды жұмыстар атқаруда, деп хабарлайды mangystaumedia.kz сайты Ақтау гарнизонының баспасөз қызметіне сілтеме жасап.
Әскерилердің тұрмыс-тіршілігін көріп, жұбайларымен бетпе-бет әңгімелесіп, үй ішіндегі хал-ахуалды сұрау олардың жұмысының тек бір бөлігі ғана.
Әйелдер кеңесінің бастамасымен бірқатар мәселер шешімін тапты. Мәселен, бір жарым жыл кезекте тұрған диагнозына қарай есепте тұрған әскери қызметшілердің балаларын Ақтау қалалық балаларды оңалту орталығы және Нұр-Сұлтан қаласындағы Республикалық балаларды оңалту орталығына төлем ақысыз порталмен жіберуге көмек көрсетті. Осылайша, ерекше балалар қажетті емді тегін алды. Сондай-ақ көпбалалы отбасылар мен мүмкіндігі шектеулі балалары бар отбасылармен де тығыз жұмыстар атқарылады.
- Бүгінгі күні әскери қызметшілердің отбасы мүшелерімен жұмысты ұйымдастыру қызметіне мол міндеттер жүктеліп отыр. Біз көп балалы әскерилерге, жаңа шаңырақ көтерген жастарға, және тағы да басқаларға үнемі қолдау көрсетіп, отбасылық мерекелік іс-шараларды ұйымдастыруға ат салысамыз, - деді әскери-теңіз базасының әйелдер кеңесінің төрайымы Әсел Хайрушева.
Бұл қызмет әскери бөлімнің күнделікті тұрмыс тіршілігіне, мейрамдарға, демалыс күндеріне көптеген іс-шаралар ұйымдастырып, жеке құрамның жауынгерлік рухтарын көтеруге елеулі үлес қосуда.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
