Ақтауда 661 отбасы АӘК алады

Қазіргі таңда Ақтау қаласы бойынша 661 отбасы немесе 2988 адам атаулы әлеуметтік көмек алып отыр, деп хабарлайды mangystaumedia.kz сайты қала әкімдігінің баспасөз қызметіне сілтеме жасап.

2020 жылғы заңнамалық өзгерістерге сәйкес кепілді әлеуметтік топтамамен атаулы әлеуметтік көмек (әрі қарай - АӘК) алушылардың 1-6 жас аралығындағы балалары қамтылуда. Қазіргі таңда 588 отбасындағы 947 балаға 1580 дана азық-түлік жиынтығы және 796 дана жеке гигиеналық құралдар жиынтығы таратылды.

Ал, ҚР Еңбек және халықты әлеуметтік қорғау Министрлігінің тапсырмасына сәйкес 2021 жылдың қаңтар айынан бастап кепілді әлеуметтік топтама «Әлеуметтік қызметтер порталы» платформасы арқылы берілуде. Яғни, АӘК алушы өзінің электронды цифрлы қолтаңбасымен 1-6 жас аралығындағы әр баласына тек порталда тапсырыс беру арқылы әлеуметтік пакетін ала алады.

Ағымдағы жылдың наурыз айынан бастап «Электрондық үкімет» (егов веб-порталы) арқылы АӘК-ке электрондық өтінім білдіру функциясы іске қосылды.

Аталған көмекке қатысты сұрақтар бойынша 43-00-19 телефон нөмірлері арқылы ақпарат алуға болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.