Облыста 607 адамға қайтарымсыз грант беру жоспарланып отыр

Бұл туралы Маңғыстау облысының Қоғамдық коммуникация орталығында өткен брифингте облыстық жұмыспен қамту және әлеуметтік бағдарламалар басқармасының басшысы Шыңғыс Дүйсенов мәлім етті, деп хабарлайды mangystaumedia.kz.

«Бизнес идеяларды іске асыру бойынша 607 адамға қайтарымсыз грант беріледі деп жоспарланды. Бүгінгі күні 55 адамға қайтарымсыз грант берілді. «Бастау бизнес» жобасы бойынша кәсіпкерлік негіздеріне республикалық бюджет есебінен 950 адамды оқыту көзделген. Оқыту сәуір айының аяғында немесе мамыр айында басталады», - деді Шыңғыс Дүйсенов.

Статистикалық мәліметтерге сүйенсек, облыста жұмысқа қабілетті 324 275 адам бар. Оның 308 446-ы жұмыспен қамтылған. Жұмыссыздар саны – 15 779 адамды құрайды. 2021 жылдың 3 айы бойынша облыста 9 311 жұмыс орны құрылды. Оның ішінде 5 345-і тұрақты жұмыс орындары болып саналады.

«Еңбек» мемлекеттік бағдарламасы шеңберінде биыл техникалық және кәсіптік біліммен 1 131 адам қамтылады деп жоспарланды. Ал қысқа мерзімді кәсіптік оқытумен 403 адам қамтылады. Министрліктің бекіткен жоспары бойынша оқыту аяқтағандардың 60% жұмыспен қамтылу қажет. Техникалық және кәсіптік білім бойынша оқыту қыркүйек айында басталады. Ал қысқа мерзімді кәсіптік оқыту сәуір айында басталады», - деді Шыңғыс Дүйсенов.

Маңғыстау облысының жұмыспен қамту және әлеуметтік бағдарламалар басқармасының ақпараты бойынша өңірде аз қамтылған отбасыларға мемлекеттік атаулы әлеуметтік көмек көрсету бойынша 2021 жылы 3,1 млрд. теңге бөлінген. Биылғы жылдың 1 тоқсанында атаулы әлеуметтік көмекпен – 2 691 отбасы, кепілдендірілген әлеуметтік топтамамен – 3 681 бала қамтамасыз етілді.

«Бұдан бөлек мүгедектігі бар азаматтардың назарына келесі мәліметті жеткізгім келіп отыр. Мүгедектігі бар азаматтар барлық тиесілі оңалту құралдары мен қызметтерін әлеуметтік қызметтер порталы арқылы алады. Ол үшін электрондық цифрлық қолтаңбасы (ЭЦП) болу қажет. Егер, ЭЦП кілттерін ашуда немесе әлеуметтік қызметтер порталында тапсырыс беруде қиындықтар туындап жатса, тұрғылықты мекенжайыңыз бойынша халыққа қызмет көрсету орталығына немесе жұмыспен қамту бөліміне жүгініп, көмек алуыңызға болады», - деді Шыңғыс Дүйсенов.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.