Бұл туралы облыстық қоғамдық коммуникация орталығында өткен брифингте Төтенше жағдайлар департаментінің бастығы Мұрат Мұханов су тасқының алдын алу кезеңі бойынша негізі дайындық жұмыстары туралы баяндамасында мәлім етті.
Оның айтуынша, дренаж жүйесінің жалпы ұзындығы 22 км құрайды. Жергілікті бюджет есебінен 5440 метр болатын дренаж жүйесінің құрылысы жүзеге асырылды. Нақты тоқталсақ, Басқұдық ауылында - 724 метр Атамекен ауылында - 4716 метрді қамтып, өнімділігі бойынша 4 құдық пен 6 су соратын қондырғы орнатылды.
«Жиналған су Басқұдық ауылынан «Қошқар Ата» көліне, Атамекен ауылынан Заозерный елді мекенінің жанындағы «Оймаша» көліне су соруға арналған сорғымен жіберіледі. Қазіргі уақытта су басудың негізгі учаскелерінде жұмыстар жүргізілді. Нәтижесінде елдімекендердің 17 көшесінде су басудан 500-ге жуық үйдің қауіпсіздігі толықтай қамтамасыз етілді», - деді Мұрат Мұханов.
Аумақтық органның мәліметіне сүйенсек су тасқыны зардаптарының алдын алу және жою үшін 1573 тоннадан астам инертті материалдар, 4290 құм салынған қап дайындалды. Сондай-ақ жанар жағар маймен қамтуға 19, азық түлікпен қамтуға 118 келісім шарт жасақталған.
«Біз көктемгі су тасқынынан туындаған төтенше жағдайлардың алдын алу және қаупін азайту мақсатында жергілікті атқарушы органдардың көмегімен жиі іс-шаралар өткізудеміз. Жаппай су тасқынына қарсы іс-шаралар айлығы ұйымдастырылды. Сондай-ақ биыл 4-5 наурыз күні «Көктем – 2021» республикалық командалық штабтың оқу-жаттығуы өткізілді», - деді Мұрат Мұханов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
