Қарақия ауданының әкімі Бозжыраға қатысты сұрақтарға жауап берді

Бұл туралы Қарақия ауданының әкімі Қыдырберді Беков өзінің фейсбук парақшасында жазды.

Құрметті жерлестер!

Өздеріңізге белгілі, әлеуметтік желіде «Бозжыра» тақырыбында өңір табиғатына қол сұқпау керек деген мәселелер көптеп талқыға салынуда. Осы тұста, тұрғындарды толғандырып жүрген бірнеше сұраққа тоқталып өтуді жөн көрдім.

Біріншіден. Қонақ үй кешенін «Бозжыра» шатқалы аумағынан 4 шақырым қашықтықтан, яғни, “Жабайыұшқан" қаумалы аумағынан тыс жерден ауданның босалқы жер қоры аумағынан салу жоспарланған.

Екіншіден. Этноауыл жобасында қонақ үй салу үшін 28,1 гектар жер телімі Қазақстан Республикасы Жер кодексінің 48-бабына сәйкес жалдау құқығымен пайдалануға Ақтау қаласында тіркелген "TETHYS AKTAU IV" жауапкершілігі шектеулі серіктестігіне берілді.

Үшіншіден, туризмді дамыту саласында қандай да бір инвестициялық жобаларды іске асырамын деген жергілікті тұрғындардың (кәсіпкерлердің) жобалары болса, оларға жер учаскелерін беруге ешқандай шектеулер жоқ. Яғни, өңдеу өнеркәсібі, туризм және басқа да салаларда нақты инвестициялық жобаларды іске асырамын деген кәсіпкерлерге, әлеуетті инвесторларға Жер кодексі шеңберінде жер учаскелерін беру мүмкіндігі бар. Бірақ, ауыл шаруашылығы мақсатында жер телімі шет елдіктерге жеке меншікке берілмейді.

Төртіншіден. "Бозжыра" шатқалының аумағы жоғарыда аталған серіктестіктің меншігіне берілген немесе сатылған жоқ. Жер орын мемлекет меншігінде болады және ол жерге келетін демалушылар мен туристтер ағымын реттеу мақсатында "Қызылсай" мемлекеттік өңірлік табиғи паркінің шатқалға келу ережесі облыстық мәслихаттың шешімімен бекітілді. Демалушылар мен туристтерге шатқалға келуге, тамашалауға кедергі болмайды. Дегенменде, ережеге сәйкес туристтер шатқалға белгіленген уақытта және регламент бойынша бара алады.

Бұдан бөлек, саяхатқа келушілердің немесе жергілікті тұрғындардың еркін жүріп-тұруын қамтамасыз ету мақсатында “Бозжыра" шатқалына (төменгі және үстінгі жағынан тамашалайтын аумаққа) асфальт жол салуға жобалық сметалық құжаттама жасақтауға қаражат бөлініп, жұмыстар жүргізілуде.

Бюджеттен қаражат бөлінген жағдайда жұмыс басталады деп жоспарлап отырмыз.

Қандай мәселе болмасын халық тарапынан пікірлер айтылуы орынды. Қазір әлем күн сайын жаңа бағытқа өзгеріп келеді. Сондықтан да барлық сала жаңа міндеттер мен тың жобаларды талап етеді.

Бүгінгі күні елдің дамуы үшін осындай маңызды жобаны жүзеге асыруда бірлікпен маңызды шешім қабылдай білуіміз керек.

Маңғыстау өңірінің көркіне айналған Бозжыра шатқалы мемлекеттің қорғауында тұрған аймақ. Ол жерге турист бармас бұрын, ол маңайдағы жануарлардың қорғалуы, оларға ешқандай зиян тимейтіндей құзырлы органдардың бақылауында болады.

Бұл жоба бір жағынан аймақтың қайталанбас табиғатын сақтау үшін аса қажетті бүгінгі күннің талабы болып отыр. Салынатын қонақ үй кешені барлық экологиялық талаптарға сай жүзеге асады. Сондықтан да әлеуметтік желіде көптеп тарап жатырған алып-қашпа әңгімеге бой алдырмай, нақты ақпаратқа жүгініп, мән-жайды дұрыс саралауымыз қажет деп білемін.

Суретті түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.