Бозжыра: 200-ден аса адамға жұмыс табылады – Облыс әкімі

Облыс әкімі С. Трұмов Бозжыра жобасына қатысты желі қолданушысының сұрағына жауап берді.

«Мен үшін туған жерімнің әрбір тасы қымбат. Осы өңірдің перзенті ретінде мен де сіздердей көркем табиғатымыздың бұзылмай, сол қалпында сақталуын қалаймын. Өздеріңіз білесіздер, Бозжыраға барушы көбейген. Көліктерімен шатқалға дейін барып, сонда тамақтанып, қалағанын жасап жүр. Оны бақылап жатқан ешкім жоқ. Жабайы туризмге тосқауыл қоймаса, Бозжыраға зиян келуі мүмкін деген мамандардың сараптамалары бар. Бұл – Бозжыра жобасын жүзеге асырудағы бірінші мақсат», - дейді облыс әкімі С.Трұмов есеп беру кездесуінде.

Аймақ басшысы аталған жоба арқылы халыққа жұмыс тауып беріп, өңірдің экономикасын көтеруді мақсат етіп отыр.

Оның айтуынша, мұнай қоры да бір күндері таусылады. Былтырдың өзінде мұнай игеру азайып кетіп, біраз табыстан айырылдық. Қазір туризмді дамыту арқылы табысқа қол жеткізу пайдалы болып отыр. Оған табиғи мүмкіндік те бар. Теңіз бар, көрікті жерлер бар.

«Бір Риксостың өзінде 700-дей облыс тұрғыны жұмыс істеп жүр. Инвесторлар салығын төлейді. Жер салығынан бастап барлық салық өңір қазынасына түседі. Бұдан ұтпасақ, ұтылып отырған жоқпыз. Осы жағына терең үңілуіміз керек. Бозжыра маңына сапар орталығын салсақ, 200-ден астам адамға жұмыс табылады. Инвестор ақша саламын деп өзі келіп тұрса, неге одан бас таруымыз керек?! Мұндай мүмкіндік күнде келе бермейді. Инвесторлар, қоғам өкілдері, жұртшылық қойған талапты орындап, «Жабайұшқанның» сыртынан, шатқалдан қашықтау жерге, 4 км жерге саламыз деп отыр. Көпшілік тек қалталылар баратын жер деп түсініп жүр екен. Ол жердегі қонақүйге тоқтамай, тіке Бозжыраға барып-қайтуға да болады. Қаумал сыртындағы сапар-орталыққа аялдап, тынығу кез келген адамға қолжетімді болады. Жобаның сол жердің аң-құсына мейлінше зиянын тигізбей жүзеге асуын қоғам болып бақылаймыз. Инвесторлар ол талапты орындауға тиіс», - дейді өңір басшысы.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.