Жемқорлықтың алдын алу шаралары маңызды

Мемлекетімізде сыбайлас жемқорлықтың алдын алужұмысы үздіксіз жүргізіліп келеді. Ел Президенті Қасым-Жомарт Тоқаевтың жолдауында да жемқорлықтың алдын алудағы жұмыстар жүйелі болу керектігі атап өтілді.

Сондай-ақ, қазан айында Қасым-Жомарт Тоқаев «ҚР кейбір заңнамалық актілеріне сыбайлас жемқорлыққа қарсы іс-қимыл мәселелері бойынша өзгерістер мен толықтырулар енгізу туралы» заңға қол қойған болатын. Заңдағы соңғы өзгерістер мен толықтырулар еліміздегі сыбайлас жемқорлық деректерін алдын алып, болдырмауға, сондай-ақ, қызметкерлердің жауапкершіліктерін сезініп, жұмысын мүлтіксіз орындауға әсер етеді деп айтуға болады. Сонымен бірге, квазимемлекеттік секторда сыбайлас жемқорлыққа қарсы комплаенс қызметтер институты болады. Комплаенс қызметкерлер жұмыс орнындағы жемқорлық тәуекелдерін анықтап, ішкі бақылауды жүргізеді. Жоғарыда аталған әрекеттер мемлекеттік ізгі қоғам құрудағы жүйелі жұмысы деп білемін.

ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департаменті тарапынан да жемқорлықтың алдын алу жұмыстары үнемі жүйелі жүргізіліп келеді. Ашықтықты қамтамасыз ету және сыбайлас жемқорлықты болдырмау мақсатында Агенттіктің «Ашық бюджеттердің интерактивті картасы» деп аталатын жоба бар. Бұл жоба арқылы тұрғындар мектеп, жол, балабақша құрылыстары сияқты жобаларға бөлінген қаржы көлемін бақылай алады. Азаматтар publicbudget.kz сайтында ақша қаражатын бақылаумен қатар, арыз-шағымдарын, өтініштерін қалдыруға болады. Қазіргі кезде жобаның тиімділігі мен маңыздылығын халыққа түсіндіру мақсатында «Ашық бюджет» клубы құрылған. Бүгінде облыс көлемінде 635 мемлекеттік мекеме - жалпы саны 1621 бюджет орналастырды. Онда жол, балабақша, мектеп, аурухана мен жергілікті атқарушы органдардың бюджеті көрсетілген. «Ашық бюджеттердің интерактивті картасы» жобасында жарияланған бюджеттің көлемі 428,2 млрд. теңгені құрайды.

Айта кету керек, «Бизнес пен инвестицияларды қорғау» жобасы шеңберінде өңірге инвестиция салып, кәсібін жүргізуді бастаған әрбір инвесторға сыбайлас жемқорлыққа қарсы сүйемелдеу бойынша қолдау көрсетіліп келеді. Бүгінде облыс бойынша 22 инвестормен жалпы сомасы 1 трлн. теңгеден асатын жобаға қол қойылған. Осылайша, инвесторларға бизнестерін жүйелі әрі кедергісіз жүргізуге көмектесіп отырмыз.

Президент тапсырмасына сәйкес, ашықтық пен қолжетімділікті қамтамасыз ету мақсатында облыстағы қала мен аудандарда 7 сервистік әкімдік «бір терезе» қағидасы бойынша халыққа ашық қызмет көрсетіліп келеді. Бұл қадам – тұрмыстық жемқорлықты жойып, ел тұрғындарының қолжетімді қызмет алуына үлкен мүмкіндік береді. Бұдан бөлек, біздің Департамент жанынан құрылған «Маңғыстау – адалдық алаңы» жобалық кеңсесі жол сапасына, дәрі-дәрмек және азық-түліктің шекті бағаларына, пандемияға байланысты өңірге келген гуманитарлық көмекті қабылдау жұмыстарына бақылау жүргізіп келеді. Мониторинг нәтижесінде анықталған кемшіліктерді жою үшін мамандар тұрақты түрде ұсынымдар әзірлеп, тиісті орындарға жолдайды.

Айта кету керек, тұрғындарғақұқықтық кеңес беру мақсатында «Antikor» алаңында «Адал көмек» жобасы шеңберінде 150-ден аса тікелей эфир өткізілді. Онда заңгерлер мен адвокаттар, сала мамандары тұрғындарға кеңес беріп, заң тұрғысынан әрекет ету жолдарын көрсетті. Ал ақпараттандыру мақсатында «Antikor.Live» жобасы шеңберінде облыстағы атқарылған жұмыстар жөнінде түсіндірмелер берілді. Департаменттің ұйымдастыруымен және қолдауымен өткен шаралар БАҚ беттерінде тұрақты түрде жарияланып келеді.

Болат ЖЫЛҚЫБАЕВ

ҚР сыбайлас жемқорлыққа

қарсы іс-қимыл агенттігінің

Маңғыстау облысы бойынша

департаментінің басшысы

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.