Маңғыстауда эпидемиологиялық жағдай тұрақты

Маңғыстау облысында эпидемиологиялық жағдай тұрақты. Бұл туралы қоғамдық коммуникация орталығында өткен брифингте Маңғыстау облысы денсаулық сақтау басқармасы басшысының орынбасары Ләззат Есенғалиева мәлім етті.

Маңғыстауда 17 қарашадағы жағдайға сәйкес, I-II деңгейлі инфекциялық стационарларда 86 адам ем қабылдап жатыр. 86 науқастың ішінде 7-нде коронавирусқа тапсырған сынама оң нәтиже көрсетті. Оның төртеуі модульді стационарда жатыр, тағы үшеуі - жүкті әйелдер.

Қазіргі уақытта орта дәрежелі жағдайда 76, жағдайы ауыр халде 9 науқас, өте ауыр халде 1 науқас бар. Бұл бөлімге түскендердің нашарлауына жедел тыныс жетіспеушілігі және ілеспе аурулардың болуы себеп. Бүгінде аймақтың оқшаулау орындарындағы төсек-орын жүктемесі 26 пайызды құрайды.

«Сонымен қатар, біз коронавирустың симптомсыз түрін жұқтырғандардың санын бақылап отырмыз. Бүгінгі күні облыста 7 адам симптомсыз тасымалдаушы болып табылады. Олар кезекші дәрігерлердің бақылауында. Бұл науқастар - Түпқараған және Мұнайлы аудандарының, Ақтау қаласының тұрғындары», - деді Ләззат Есенғалиева.

Облыс көлемінде 335 инфекциялық І-ІІ сатылы төсек орын бар. Сондай-ақ, реанимациялық төсек саны 43. Анықтамасыз шетелден келген Қазақстан Республикасының азаматтары мен шетел азаматтарына арналған карантиндік стационарларда барлығы 270 төсек орын бар.

«Шетелден ПТР анықтамасыз келген азаматтарға 270 карантиндік төсек орын бар. Бүгінде біздің облыстың 28 азаматы карантиндік стационарларда ПТР нәтижелерін күтуде», - деді Ләззат Есенғалиева.

Баспасөз конференциясында Маңғыстау облысының міндетті әлеуметтік медициналық сақтандыру қоры басшысының орынбасары Жанетта Керімбаева да қатысты. Оның мәліметінше, 9 айдың қорытындысы бойынша облыстық МӘМС 46 медициналық ұйыммен келісімшарт жасады. Оның 24-і мемлекеттік ұйымдар, яғни 52% және 22-і жекеменшік нысандар болып табылады, яғни 48%. Олар жасалған шартқа сәйкес, мемлекеттік орталықтар сияқты бірдей қызмет көрсетеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.