Ақтаудағы Назарбаев зияткерлік мектебін 162 түлек бітірді

Бүгін Ақтау қаласындағы Назарбаев зияткерлік мектебінің тарихында тұңғыш рет онлайн-соңғы қоңырау соғылды, - деп хабарлайды mangystaumedia.kz сайты.

Салтанатты шара Microsoft Teams платформасында ұйымдастырылды. Екі кезеңде созылған жиынға оқушылар, ұстаздар және ата-аналар онлайн қатысты. Алғашқы жиын мектеп бітіріп жатқан 162 түлекке арналды, ал екінші кезеңде төменгі сынып оқушылары өз шаңырақтарында мектеп директорының орынбасарлары мен шаңырақ кураторларымен онлайн-кездесу өткізіп, оқу жылын қорытындылады. Жиын барысында мектеп директоры Ермек Пайзов мектеп бітіруші түлектерді құттықтап, «Назарбаев Зияткерлік мектептері» ДББҰ басқарма төрайымы Күләш Шамшидинованың құттықтау хатын оқып берді.

«Құрметті түлектер! Сіздерді бүгінгі мектеп бітірулеріңізбен шын жүректен құттықтаймын! Шекара деген түсінікке бағынбаған бүкіләлемдік коронавирус пандемиясымен қүресу мақсатында елде төтенше жағдай орын алды. Осыған байланысты бүгін сіздермен онлайн-кездесіп отырмыз. Сіздерді сағынсақ та, елдің жас ұрпағының денсаулығы бәрінен маңызды», - деді Ермек Серікұлы.

Сондай-ақ мектептің қамқоршылар кеңесінің төрағасы Бекмұрат Жүсіпов те түлектерді оқу жылының аяқталуымен құттықтап, түлектерге үлкен өмірге сәтті қадам тіледі. Салтанатты жиыннан соң оқушылар елдің танымал әншісі Димаш Құдайбергеннің НЗМ түлектеріне арналған құттықтау видеосын тамашалады.

Айта кету керек, биыл зияткерлік мектепті 162 түлек аяқтап отыр. Бұл оқу орнының тарихындағы ең көп түлек. Оқу жылының аяғында 9 алтын белгі, 9 үздік аттестатқа үміткер өз білімдерін дәлелдеп, үздік нәтиже көрсетті. Сонымен қатар биыл оқу жылында түлектердің IELTS және SAT емтихандарындағы көрсеткіші де жоғары екендігі байқалып отыр. Атап айтқанда ағылшын тілін меңгеру деңгейін анықтайтын IELTS емтиханынан Даяна Булатбекова, Әйгерім Шораева, Інжу Көшербаева, Малика Нұрмұхамет және Амина Абиль 8,0 балл жинады.

Ақтаудағы Назарбаев зияткерлік мектебінің түлектері АҚШ, Канада, Нидерланд, Оңтүстік Корея, Гонконг, Венгрия, Сингапур, Түркия, Ресей елдеріндегі белді университеттерінің студенті атануға шақырту алды. 23 түлек Назарбаев Университетінің (Foundation – 17, Direct - 6), 12 –түлек Венгрия университеттеріне 100 % білім грантын алса, 40-тан аса түлегіміз Канада, АҚШ, Туркия, Гонконг және Венгрия университеттерінен жауап күтіп отыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.