Соңғы қоңырау онлайн соғылды

Бүгін 150 826 маңғыстаулық оқушы үшін соңғы қоңырау шарасы онлайн режимде өтті. 1 мен 10-сынып оқушылары үйінде отырып, әлеуметтік желілер арқылы өткізілген сынып сағаттарына қатысты. Бұл шараға аймақтың танымал тұлғалары, үздік түлектері мен бизнес өкілдері де атсалысты.

Жуырда ғана өңірлік қоғамдық коммуникация орталығында өткен баспасөз мәслихатында Маңғыстау облыстық білім басқармасының бас­шысы А.Сейдалиев соңғы қоңырау іс-­шарасы жөнінде жан­-жақты мағлұмат берді.

Оның мәліметіне сүйенсек, биыл 6 365 оқушы мектеп бітіреді. Оның ішінде 5 931-­і күндізгі мектептің, 434­-і кешкі мектептің түлектері. Пандемия жағдайына байланысты биыл 9 және 11­сынып бітіруші түлектеріне арналған қорытынды аттестат­тау өткізілмейді. Мектеп бітіргендігі туралы аттестаттарға 4 тоқсанның жылдық бағалары қойылады.

11-­сыныпта 205 оқушы «Алтын белгіге», 329 оқушы «Үздік аттестатқа» үміткер.

Қазақстан Республикасының орта білім беру ұйымдарында­ғы «Біргеміз: ТҮЛЕК–2020» тақырыбындағы мектеп біті­ру іс-­шарасының тұжырымдамасына сәйкес 25 мамыр күні «Сәт сапар, жас түлек!», «Ұстаздарға мың алғыс», «Мектеп – білім ордасы», «Көңілді жазғы демалыс» тақырыбында білім мәселелеріне арналған сюжеттік желі ұйымдастырылады. 1–10­-сыныптарға соңғы қоңырауға арналған онлайн-­сынып сағаты өткізіледі. Оған қамқоршылық кеңестердің мүшелерін, аймақтың танымал тұлғаларын, еліміздің және әлемнің үздік университеттерінде білім алып жатқан жетістікке жеткен мектеп түлектерін, бизнес өкілдерін және мемлекеттік қызметшілерін қонақ ретінде шақырады.

• Мектеп бітіру шаралары әр сыныпта бөлек, мектеп алаңында, ашық ауада өткізіледі;
• Түлектер іс­-шараға мектеп формасымен қатысады;
• Мектеп әкімшілігі мектеп бітіру кештерін өткізу күндері тәртіп бұзушылыққа жол бермеу шараларын қабылдайтын болады.

Мектептерде соңғы қоңырауды өткізу барысында сақтық шаралары қатаң сақталады.

Сондай-­ақ биыл мерекелік мектеп бітіру кештерін өткізуге жол берілмейді, атап айтқанда:

• Іс­-шараларға аниматорларды, мерекелік агенттіктерді, жеке студияларды тартуға;
• Көл-­көсір мектеп бітіру шарасын өткізуге;
• Мерекелік үстелдерді ұйымдастыруға;
• Көлік жалдау арқылы қала ішінде экскурсия өткізуге;
• Мейрамханаларда, кафелерде және басқа да ойын­-сауық мекемелерінде, теңіз жағасындағы демалыс орындарында бітіру шараларын ұйымдастыруға;
• Мерекелік шаралар өткізуге ата-­аналар мен заңды өкілдерінен қаржы жинауға, мұғалімдер мен мектептерге сыйлықтар жасауға тыйым салынған.

Бұл бойынша аудандық, қалалық білім бөлімдеріне басқарма тарапынан нақты тапсырмалар берілген.

Голрох ЖЕМЕНЕЙ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.