Аймақта ерікті донорлар саны азайған

Аймақта қан орталығына келетін донорлар саны азайды. Бұл туралы Маңғыстау облысы қан орталығының директоры Рафаэль Сарсамалиев мәлімдеді, - деп хабарлайды mangystaumedia.kz сайты.

Әлемде COVID-19 инфекциясының таралуына байланысты төтенше жағдай жарияланған болатын. Облыстық қан орталығының директоры Рафаэль Сарсамалиевтың айтуынша, Маңғыстауда қан тапшылығы сезілуі мүмкін. Себебі елдегі төтенше жағдайға байланысты қан тапсыратын донорлар азаюда. Ал қанға және оның компоненттеріне сұраныс төмендеген емес. Егер бұл жағдай жалғаса беретін болса, медициналық мекеме сұраныс берушілердің өтінішін орындай алмауы мүмкін. Бұл мәселе тек Маңғыстау өңірінде ғана емес, республика бойынша сезіле бастады.

«Біз ерікті донорларды қан тапсыруға шақырамыз. Біздің орталықтың есігі ашық, ал мамандарымыз бетперде киіп жүр. Яғни, қандай да бір ауруды жұқтыру қаупі жоқ. Оның үстіне халық бұрынғыдай көп келуді азайтты. Ал қан тапсыруға ниет білдіргендер болса, олармен алдын-ала сөйлесеміз. Егер жақын арада алыс немесе жақын шет елде болғаны анықталса қан алынбайды», - дейді ол.

Қан құю ең алдымен жол-көлік оқиғасынан зардап шеккендерге, өндірістік нысандарда жарақат алғандар мен ауруханада түрлі күрделі ота жасағанда керек. Сонымен қатар перинаталдық орталық та қанды қажет етеді. Әсіресе, қан онкологиялық ауруға тап болғандардың, оның ішінде лейкоз және гемофилияға шалдыққандардың өмірін ұзарту үшін де ауадай қажет.

«Қан қоры әзірге жетеді, алайда қол қусырып қарап отыруға тағы болмайды. Сол себепті алдын-ала жұмыстана бергенді жөн санап отырмыз. Мәселен, күтпеген жерден техногендік жағдай орын алса барлық мекемелерді қанмен қамтамасыз ете алмауымыз мүмкін. Қан тапсыру адамның ағзасына өте пайдалы. Донор тарапынан үрей болмасын, керісінше адам бойындағы қан айналымы жақсарады және денсаулыққа ешқандай зияны болмайды», - деп түсіндірді Рафаль Сарсамалиев.

Айта кетейік, ерікті донор ретінде қан тапсыру үшін Ақтау қаласы 34а шағынауданында орналасқан облыстық қан орталығына барасыз. Сондай-ақ 8 (7292) 40-32-78 нөміріне қоңырау шалып, кеңес ала аласыз.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.