Республикалық байқауда маңғыстаулық 2 дәрігер үздік атанды

Бұл туралы Маңғыстау облыстық «Әлеуметтік медициналық сақтандыру қоры» мәлімдеді, - деп хабарлайды mangystaumedia.kz сайты.

24 желтоқсан күні Нұр-Сұлтан қаласында ұйымдастырылған «МӘМС: Қазақстан медицинасының трансформациясы» форумында 2 маңғыстаулық дәрігер салтанатты түрде марапатқа ие болды.

Бейнеу аудандық орталық емханасының дәрігері Бағила Нұрмағанбетова және Ақшұқырдағы «Жоламан» жеке меншік медициналық орталығының дәрігері Гүлнар Дәрібаева «Үлгілі отбасылық дәрігер және оның тобы» номинациясына ие болып, әр топ 500 мың теңге көлемінде қаржылай сыйлықты қанжығасына байлады.

Бір қызығы, жүлде алған маңғыстаулық дәрігерлеріміз туралы БАҚ беттерінде қызықты мәліметтер жарияланыпты. Бейнеулік жеңімпаз Бағила Нұрмағанбетова 2017 жылы 2 қазан күні жолаушылар пойызында жүкті әйелді аман-есен босандырып алған. Ал екінші жеңімпаз Гүлнар Дәрібаева дәрігерлік біліктілігі мен жанкешті еңбегінің арқасында бірнеше жылдан бері адал қызмет етіп келеді.

Байқау ұйымдастырушылары «Әлеуметтік медициналық сақтандыру Қоры» КЕАҚ және «Primary Health Care» Ұлттық Ассоциациясы болды. Ал демеушілік еткен – «Банк ЦентрКредит» Акционерлік Қоғамы.

Байқауда тек мемлекеттік және жеке медициналық мекемелерде қызмет атқаратын отбасылық және жалпы тәжірибелік дәрігерлерлер өз топтарымен қатысуға мүмкіндік алды. Байқауға 14 аймақтан 34 үміткер қатысқан.

Айта кетейік, «Ең үздік отбасылық дәрігер мен оның тобы» номинациясымен бас жүлдені семейлік дәрігер Сайра Айтхожина және оның командасы жеңіп алды. Бұл командаға 5 млн теңге көлемінде жүлде берілді. 3 млн теңге көлеміндегі жүлдені нұр-сұлтандық Нұршат Садирбеков пен оның тобы, сондай-ақ қостанайлық Нұржамал Бимағанбетова мен оның тобы еншіледі.

Міндетті әлеуметтік сақтандыру жүйесінің іске асырылу қарсаңында республика бойынша «Ең үздік дәрігер және оның тобы» атты конкурс 6 желтоқсан күні басталған болатын.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.