«Каспий» командасы Қазақстан Премьер-лигасына өтті

Ақтау халықаралық әуежайында жуырда ғана футболдан Қазақстан Премьер-лигасына өткен «Каспий» футбол командасын облыс әкімінің орынбасары Қ.Жұмашев, Ақтау қалалық спорт және дене шынықтыру бөлімінің басшысы Қанат Жұмабаев пен бір топ жанкүйерлер қошеметпен қарсы алды. «Иә, солай, біздің «Каспий» осындай» деп ұрандатқан бірнеше автобус жалдаған футболсүйер қауым қала әуежайын бір сәтте лық толтырды. Ол жерде ойыншыларға арналған қазақы шұбат, бауырсақ, балқаймақ, құрт толы дастархан әлдеқашан жайылып қойған. Футболшылар негізгі залға шыға салысымен, әдемі қазақ көйлек киген төрт қыз шашу шашып, жанкүйерлер «Адай» күйімен қарсы алды. Көптен күткен қуанышты кездесуде бірінші болып Қ.Жұмашев сөз сөйледі. — Бүгін - Маңғыстауда ақ түйенің қарны жарылған күн. 18 жыл бойы күткен сәт туды. Баршаңызды осы күнмен құттықтаймыз. Бәрімізге мәлім, біздің облысымыз спорт жағынан жақсы дамыған. Алайда футболымыз бірнеше жыл ақсаңдап тұрды. 18 жылы бойы жоғарғы дивизионға өте алмай келдік. Бірақ біз өттік, қолымыздан келді. Облыс әкімдігінің атынан «Каспий» клубын құттықтаймын, — деді облыс әкімінің орынбасары. — Әрине, бұл - барша команданың жеңісі, жемісі, дегенмен клубтың бас бапкері Сава Ковачевичке алғысымызды жеткізгім келеді. Былтырдан бері клубқа облыс әкімдігі өте үлкен қолдаулар көрсетті, футболшыларымызға жақсы жалақы төлей бастадық. Бұл жұмыс әлі де жалғасады. «Стадион қашан салынады?» деген жанкүйерлер сұрағына Қ.Жұмашев: «Құрылысты келесі жылы бастаймыз!» — деп, жиналған қауым мен команда өкілдерін бір қуантты. — Маусым ұзақ әрі қиын болды. Жыл басында Премьер-лигаға шығу керек деп алға мақсат қойдық. Футболшыларды психологиялық тұрғыдан дайындау қиын болды. Премьер-лиға шығуға лайықты деп ойлаймыз. Жеңілістерімізге қарамастан, өз жолымызды сенімді жалғастырдық. Қала және облыс әкімдіктеріне, спорт басқармасына алғысымыз шексіз. Бұл тек клубтың ғана емес, баршамыздың жеңісіміз,— деді өз кезегінде черногориялық маман. Сондай-ақ бас бапкер команданы келесі жылы да жаттықтыратын мәлімдеді. Кездесуде Бірінші лиганың осы маусымдағы сұр мергені, «Каспий» шабуылшысы Айдос Тәттібаев да өз сезімдерімен бөлісті. Жанкүйерлерді құттықтай отырып, Премьер-лигада дәл осындай көрсеткіш көрсететіне сенімді екенін жеткізді. «Каспий» осы маусымда Бірінші лигадағы жолын 6 сәуірде теміртаулық «Шахтер-Болатқа» қарсы бастады. Содан бері ақтаулықтар 26 матч өткізіп, оның 17-сін жеңіспен аяқтаса, не бары төрт рет жеңіліп, бес рет тең ойнады. С.Ковачевичтің ойынша, «Каспийдің» ең мықты қарсыласы «Қызылжар» командасы болған. «Каспий» петропавлдықтармен екі рет жүздесіп, екі рет ұтылып қалды: Петропавлдағы ойында 1:0, Ақтаудағы кездесуде 0:2 есебімен есе жіберді. Соңғы турға дейін каспийліктердің Премьер-лигаға шығар-шықпасы белгісіз болды. 25-турдың қорытындысы бойынша, «Каспий» екінші орында 53 ұпаймен тұрса, үшінші орынға 52 ұпаймен «Алтай» командасы жайғасқан-ды. 26-турда ақтаулықтар «Шахтер-Болаттан» 0:3 есебімен басым түсті. Ал «Алтай» «Екібастұзбен» тең ойнап, төртінші орынға түсіп қалды. Үшінші орынды өз алаңында «Астана М» командасын жеңген «Ақжайық» клубы иеленді. Олар енді ҚПЛ-ға өтуі үшін «Таразбен» кездесетін болады. Айта кетерлігі, Бірінші лигада енді «Қызылжар» мен «Каспий» командалардың орнына «Атырау» мен «Ақтөбе» ойнайды. Олар ҚПЛ-да тиісінше 11 және 12-орындарды иеленіп, келесі маусымда жоғарғы дивизонда өнер көрсету мүмкіндігінен айырылды.

Арай ЖАУПЕРОВА