АИТВ-мен тіркелетіндер кімдер?

ЖИТС-тың алдын алу және оған қарсы күрес жөніндегі Маңғыстау облыстық орталығында  1994 жылдан бері АИТВ инфекциясын жұқтырғандар тіркеліп келеді. Бүгінде тіркелгендер қатары 346-ға жетсе, олардың үшеуі—14 жасқа дейінгі балалар. Орталықтың эпидемиология бөлімінің меңгерушісі Жәмила Махамбетқалиева биылғы бірінші жарты жылдықта өңірімізде аталмыш инфекциямен 27 адам тіркелгені туралы мәлімет жеткізді. Бұлардың үшеуі шет елдер азаматтары, қалғандары қазақстандықтар. -Өткен жылдың осы кезеңінде де 27 АИТВ инфекциясы тіркелген болатын,-дейді Ж.Махамбетқалиева.-Олардың жиырмасы Қазақстан Республикасының азаматтары, ал жетеуі шет елдер азаматтары. Аудандарға бөліп қарасақ, АИТВ инфекциясымен тіркелендердің 17-і Ақтау қаласынан, 3-і Мұнайлы ауданынан, 2-і Қарақия және Түпқараған аудандарынан. Ал үшеуі шетелдіктер. Ал жас аралығы туралы айтсақ, АИТВ инфекциясы 20-65 жас аралықтарындағы адамдарда тіркеліп отыр. АИТВ-ның 15-49 жас аралығында азаматтар арасында таралу көрсеткіші 0,06%, яғни берілген критерийден (0,08%) аспайды. Маман келтірген мәліметтерге сүйенсек, АИТВ инфекциясы әйелдерге қарағанда ер азаматтарда 2,4 есе жиі кездесетін көрінеді. -Әлеуметтік топтар бойынша талдайтын болсақ, АИТВ-инфекциясы жұмыс жасайтындар арасында 37,5% анықталған болса, жұмыссыздар арасында 41,7% және басқа топтарда 20,9% анықталған,-дейді бөлім меңгерушісі.-Берілу жолдары бойынша алдыңғы қатарда гетеросексуальдық жыныстық қатынас арқылы, яғни кездейсоқ, коммерциялық немесе бейтаныс адамдармен қатынаста болғандар арасында тіркелген. Барлық АИТВ инфекциясын жұқтырған адамдармен тестке дейінгі және тестен кейінгі кеңестер жүргізіліп, құқықтары мен міндеттері түсіндіріліп, жақын қарым-қатынастағы адамдары АИТВ инфекциясына тексерілді. АИТВ инфекциясы анықталған Қазақстан азаматтары мен облыс аймағында тұрақты мекендейтін шет елдер азаматтары диспансерлік есепке алынды.