Оразақын Асқар дүниеден озды

Қазақ ақыны Оразақын Асқар дүние салды. Бұл мәліметті Қазақстан Жазушылар одағының баспасөз қызметі растады, - деп хабарлайды mangystaumedia.kz сайты Tengrinews.kz-ке сілтеме жасап.  "Оразақын Асқар қайтыс болды. Ақынмен қоштасу рәсімі Жазушылар одағында өтеді. Ертең, 25 қаңтардаі сағат 10.00-де Қазақстан Жазушылар одағынан шығарады", - деді одақтағылар. Оразақын Асқар 1935 жылы 16 мамырда Шығыс Түркістан өлкесінің Іле аймағына қарасты Мүкей Қаратас деген жерде дүниеге келген. Бастауыш білімді Сарыбұлақ мектебінде алып, Құлжа қаласындағы "Білім жұрты" деп аталатын гимназияда оқыған. 1951 жылы Үрімші қаласында ашылған Ұлттар институтының тіл және әдебиет факультетіне түсіп, оның екінші курсын аяқтағаннан кейін "Шыңжаң газеті" редакциясына қызметке тұрады. Бұл жылдары сол газетке және "Шұғыла" журналына өлеңдері жиі жариялана бастайды. 1955 жылы атамекені Қазақстанға көшіп келіп, 1961 жылы Қазақ Мемлекеттік университетінің филология факультетін бітіріп шығады. 1955 жылы жарық көрген "Қос жүрек" атты жас ақындардың ұжымдық жинағына өлеңдері енген. Біраз жыл Қазақ КСР Ғылым академиясының Ш.Уәлиханов атындағы Тарих, этнография және археология институтында кіші ғылыми қызметкер, одан кейін Қазақстан Жазушылар одағының көркем әдебиетті насихаттау бюросында нұсқаушы, республикалық Кітап палатасында бөлім меңгерушісі, "Жалын" баспасында аға редактор болған. Қазақтың қара өлеңін жинап, екі томын бастырды. "Балауса" баспасында "Әдеби мұра" бағдарламасына орай, "Әлем балалар әдебиетінің "қазақ тіліндегі елу томдығын шығару жұмысына атсалысқан. 1996 жылдан бері Қазақстан Жазушылар одағы басқармасының мүшесі. Халықаралық "Алаш" әдеби сыйлығының лауреаты. "Ерен еңбегі үшін", "Тәуелсіздіктің 10 жылы" медальдарының иегері. Мұқағали атындағы сыйлықтың иегері. Панфилов ауданының Құрметті азаматы.