«Ауылым – ел бесігі» жастар керуені Ақшұқыр ауылында

Маңғыстау облыстық жастар саясаты мәселелері басқармасы мен «Бауырлас жауынгерлер» ауған соғысы ардагерлерінің қоғамдық бірлестігі ұйымдастыруымен өткен шара бірнеше ауылды аралап келеді. Қазан айының 23-де жолға шыққан керуен бұған дейін Мұнайлы ауданында, Басқұдық, Қызылтөбе-2 ауылдарына ат басын тіреген. Алда Таушық, Форт-Шевченко, Қызылсай, Рахат, Теңге ауылдарына да сапарын жалғамақ.

Мақсат - аудан, ауылдарды аралап, жастармен бетпе-бет жүздесіп,  жастар саясатын, мемлекеттік бағдарламаларды түсіндіру. Әдістемелік кеңестер беріп, ұсыныс-пікірлерін тыңдау, талқылау.

Бүгін керуен Ақшұқыр және Сайын елді мекендерінің жастарымен кездесті. Керуен құрамында Маңғыстау облыстық жастар саясаты мәселелер басқармсының басшысы Бауыржан Тұяқов, «Бекен» жас көшбасшылар достастығы бірлестігінің төрағасы Мұқаш Бекенұлы, «М. Тынышбаев атындағы ҚазККА» Ақтау көлік колледжі директорының орынбасары Бауыржан Сәтбаев, «Тұрғын үй құрылыс жинақ» банкі АҚ МО филиалының менеджері Майлыбаева Балияш, МО Дін істері басқармасы ақпараттық талдау орталығының теологы  Саид Абдулхамидов, МО кәсіпкерлік және сауда басқармасының бас маманы Мұханбет Өтегенов, «Бауырлас жауынгерлер» қоғамдық бірлестігінің төрағасы Мәтжан Шаулиев, МО Жастар ресурстық орталығының директоры Досан Жеткізген бар.

Елбасы 5 қазан күнгі Жолдауында келесі жылды «Жастар жылы» деп атауды ұсынған болатын. Осыған орай алдағы жылы атқарылар жұмыстар жоспарын жасақтау үшін жастардың пікірін білу де маңызды.

-Мемлекеттік органдардың, әртүрлі институт мамандарының басын қосып, аудан-ауылдардың жастарымен кездесіп, ақылдасуды, пікірлесуді мақсат еттік. «Жастар жылы» жастарға үлкен мүмкіндіктер берілетін жыл. Ол туды ұстап, той тойлау деген сөз емес. Жастардың мәселесін шешуге барлық орган, құрылымдар атсалысатын болады. Жұмысқа орналасуына, білім алуына, баспаналы болуына қолдау көрсетіліп, денсаулығына көңіл бөлінбек. Қазір облыста «Жастарға қандай көмек көрсете аламыз?» деген жол картасын дайындап жатырмыз. Осы мақсатта ауылдарға шығып, ұсыныстарды жинақтап жатырмыз. «Келер жылы не ұйымдастыруға болады? Қандай мәселелерге назар аудару қажет?» деген сауалдарға жауап іздейміз. Жастарымыздың дұрыс ойлауына, алдына дұрыс мақсат қоя білуіне септігімізді тигізгіміз келеді. Қажетсіз дүниелермен айналысқанша, біз де өзге мемлекеттердің жастары секілді бәсекеге қабілетті болайық. Ағылшын тілін үйренейік, саяхаттайық, әлемдегі барлық оқу, трендтерді үйренейік. Бірақ оларды үйрену арқылы түп-тамырымызды, тәлім-тәрбиемізді өзімізбен алып жүрейік, - дегенді айтты Бауыржан Тұяқов.

Қазір облыс бойынша 8 жастар орталығы бар. Әр аудан, қалаларда орналасқан орталықтар  жастардың мүдделерін қорғап, бастамаларына қолдау білдіріп, жұмыстарын үйлестірумн айналысып келеді.

-Өкінішке қарай, кей жағдайда қазақ жастарында әлі күнге дейін кішігірім жалқаулық, енжарлық деген дүние байқалатыны жасырын емес. Елбасы «Рухани жаңғыру» мақаласында ең бірінші «Бәсекеге қабілеттілік» дегенді айтады. Мысалы, білесіздер, қатар құрбымыз Айфон 6 алса, біз Айфон 7,8 алуға тырысамыз. Яғни, біз өмір бойы жарысып келе жатырмыз. Бұл нарықтық заманның әсері секілді. Әл-Фараби, Әлкей Марғұлан, Халел Досмұхамедов сынды мықты тұлғалар шыққан топырақтан Нобель сыйлығының иегері шықпайды дегенге сенбеймін. Себебі бізде ол тектілік, ол ұлылық бар, оны ояту ғана қалды. Елбасы «Өмір сүру үшін өзгере білу керек, өзгере алмағандар тарих шаңында қалады» деді. Өзгеріс деген – сынға дайын болу, жаңаша ойлау, кей нәрселерді басқа қырынан табу. Жалпы айтылған Елбасының сөздерін іске асырушы да, игілігін көруші де – бізбіз. Сондықтан еңбектенуіміз, жаңашылдыққа ұмтылуымыз қажет, - деп Мұқаш Бекенұлы замандастарын қайрап, бір жігерлендіріп алды.  Ол жас болса да әлемдік деңгейге танымал, адамзатқа пайдалы істерімен көзге түскен тұлғаларды тілге тиек етіп, оларды көпке үлгі етті. Өзі секілді жастарды бәсекеге қабілетті, білімді, ізденімпаз болуға шақырды.

Жастар мәселесінде білім алып, үйлі болудан өзге қоғамдағы рөлі, оларға сыртқы ортаның әсері де назардан тыс қалмайды. Мәселен, діни сауаттылығы, көзқарасы. Бұл тақырып бойынша теолог Саид Абдулхамидов тұшымды әңгімелер айтып, жастарға ой салды.

-Қазір жастарымыз дін мәселесіне, намазға қызығушылығы оянса, ғаламтордан қарайды. Бүгінгі таңда мыңдаған теріс ағымдағы парақшаға тосқауыл қойылып жатыр. Қатарында «белсенді өмір», «ислам», «Қанафи масхабы» деп ашып қойғандар бар. Яғни, аты басқа, ішкі кейпі басқа болып жатыр. Сондықтан интернеттен алынған дүниелерді бақылап, сараптаған жөн, - дейді ол.

Сонымен қатар теолог діни адасушылықтың алдын алу, діни ақпараттарды дұрыс қабылдау, ата-ананың қадірі, баланың парызы т.б.  жөнінде кеңестерін ортаға салды.

-Туған күні болса бетіне тортты, неше тұрлі тағамды төңкеріп, көліктен түсе салып билеу жастар арасында белең алып кетті. Олар аға-әпкелерінен көріп жасап жатыр. Сол себепті жасап жатқан дүниеңіздің пайдасы бар ма, жоқ па ойланған жөн. Өзіңізден кейінгі кішілер сіздерді «аға» деп, «әпке» деп үлгі тұтады. Сондықтан іс-әрекетімізге,  сөзімізге жауап берсек, - деді Саид Абдулхамидов.

Кездесуге келген жас мамандар, оқушылар спикерлерді тыңдап болған соң өз сұрақтарын қойып, жауап алды. Олардың білім, баспана алу мәселесіне көбірек көңіл бөлетіні байқалды. «Тұрғын үй құрылыс жинақ» банкінің өкілі оларға баспана алу жолдарын, салымдар жүйесі, құжаттарды жинақтау жөнінде кеңес берді. Жиын аяғында қатысушы жастар тегін түрде банктен өз  шоттарын ашуға мүмкіндік алды.

Теңге БЕКМҰРЗАЕВА

Суреттерді түсірген Талант ҚҰСАЙЫН

[gallery td_select_gallery_slide="slide" ids="64751,64749,64748,64747,64746"]