Ақтаулықтар самбодан әлем чемпионы Дәурен Төлегеновті қарсы алды
[ 2019 ] 16 қазан, 07:25 | Жаңалықтар
Ақтаулықтар 10-13 қазан аралығында Ташкентте өткен әлем бірінішілігінде самбодан чемпион атанған Дәурен Төлегеновті әуежайдан қарсы алды, - деп хабарлайды mangystaumedia.kz сайты.
Әлемнің алтын жүлдегерін Маңғыстау облыстық спорт басқармасы басшысының орынбасары Қанат Жұмабаев, «Жас батыр» спорт мектебінің басшысы Манарбек Бисекенов, туыстары мен жақындары керемет көңіл-күйде, асқан ізеттілікпен күтіп алды. Әуежайға кеудесі қуаныш толып кірген спортшы бауырсақ пен шұбаттан дәм татты. Қуанышқа орай шашу шашылып, жиылған көпшілік чемпионды құттықтауға асықты.
[gallery td_select_gallery_slide="slide" ids="86372,86373,86374"]
МО спорт басқарма басшысының орынбасары Қанат Жұмабаев пен «Жас батыр» спорт мектебінің басшысы Манарбек Бисекенов бастаған құттықтау сөзді, чемпионның әжесі жалғады.
- Жарыс жақсы деңгейде өтті. Ағайлармен бірге қойған мақсатыма жеттім. Әлемдік деңгейде әнұранды шырқатқанда ерекше сезімде болады екенсің. Бұрын додаларда белдесіп жүрген спортшылармен кездестім. Жарыста бірінші тәжік балуанымен белдесіп, 6-1 есебімен жеңдім. Содан соң Әжірбайжандық спортшымен күресіп, оны ауырту әдісімен ұттым. Ал Колумбия самбошысын 9-0 есебімен жеңіп, финалға шықтым. Ақтық сында өзбек балуанынан басым түсіп, жеңіс тұғырына шықтым. Қолдау білдіріп жатқан облыс әкімшілігіне, Самбо федерациясының басшылары мен «Жас батыр» ұжымына алғысымды айтамын, - деді чемпион Дәурен Төлегенов.
«Жас батыр» спорт мектебінің шәкірті әлем біріншілігінде 56 келі салмақта сынға түскен еді. Әлем чемпионатында көк туды желбіреткен балуан 8 жылдан бері осы спорт түрімен айналысып келеді. Бейнеу ауданында туып-өскен самбошы бұған дейін Жыңғылды ауылында жаттыққан. 2 жылға жуық уақыт Ақтаудағы «Жас батыр» спорт мектебінде талабына қанат бітіріп жүр.
- Бұл бала көптеген халықаралық жарыстарда жеңімпаз атанып жүр. Қыркүйек айының басында Азия чемпионы болған еді. Енді әлем чемпионатында жеңімпаз атанып отыр. Бәріміз қуанып жатырмыз. Ойлағанымызға жеттік. Көпшіліктің қолдауы мен еңбектің арқасы деп ойлаймын, - Айбек Жанболатұлы МО жастар арасында самбодан аға жаттықтырушы.
Махаббат НҰРЖАНҚЫЗЫ
Суреттер автордан
[gallery td_select_gallery_slide="slide" ids="86375,86377,86378"]
1447
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
