Бейнеу ауданының әкімі Бауыржан Нарбаевқа ат мінгізді (ФОТО)

Бейнеу ауданының әкімі Бейнеубек Әбілов жастар арасында дзюдодан Әлем чемпионатының қола жүлдегері және Азия чемпионы Бауыржан Нарбаевқа ат мінгізіп, кезекті жеңісімен құттықтады. Одан бөлек шәкірттері талай дүбірлі додаларда топ жарып, аймақ абыройын асқақтатып жүрген маңғыстаулық белгілі бапкер, білікті басшы Манарбек Бисекеновке алғысхат табыстады.

Айта кету керек, 19 жасар Бауыржан бұған дейін бірнеше республикалық, халықаралық жарыстарда топ жарып, аймақ абыройын асқақтатып жүр. Мамыр айында Литваның Каунас қаласында дзюдодан жастар арасында өткен жарыста сәтті өнер көрсетіп, Еуропа кубогының иегері атанды. Және Қырғызстанның астанасы Бішкек қаласында жастар арасында дзюдодан Азия чемпионатында алтыннан алқа тағып, Азия чемпионы атанған болатын. Жақында жерлесіміз Хорватияда жастар арасында өткен дзюдодан Әлем чемпионатының қола жүлдесіне қол жеткізді.

- Елге келгенде үлкен құрмет көрсетіп, қуанышыма ортақтасып жатқан барша ағайынға алғыс айтамын. Самбодан Әлем чемпионы атанған бауырым Рамазан Мамаев пен мені ҚР Мәдениет және спорт министрі Арыстанбек Мұхамедиұлы арнайы спорт залға келіп құттықтаса, облыс әкімі Ералы Тоғжанов бір топ балуандарды жеке қабылдап, ізгі тілегін білдірді. Мұның барлығы әрине қаншама жылғы төккен тердің, нәтижелі еңбектің жемісі деп білемін. Жастайымнан мені спорт залға жетелеп әкеліп, болашағымнан үлкен үміт күткен ата-анама, дзюдо мен самбоның қыр-сырын үйретіп, бауырына басып, баласындай тәрбиелеген бапкерім Манарбек Бисекеновке алғыс айтамын, - дейді жастар арасында дзюдодан Әлем чемпионатының қола жүлдегері Бауыржан Нарбаев.

Өз кезегінде облыстық «Жас батыр» мамандандырылған балалар мен жасөспірімдер спорт мектебінің басшысы Манарбек Бисекенов Қызан ауылында спорт зал салып, ауыл балаларына жағдай жасаған және аймақта самбо күресінің дамуына өлшеусіз үлес қосқаны үшін «ҚР самбо федерациясының» медалімен Бейнеубек Әбіловті марапаттады. Мұнан кейін Бауыржан Нарбаев білім алған «Абай» атындағы орта мектепте оқушылармен кездесіп,  облыстық «Жас батыр» мамандандырылған балалар мен жасөспірімдер спорт мектебінің Бейнеудегі филиалында ауыл жастарына  шеберлік сабағын өткізді. Аталмыш спорт мектебінде балуандарды білікті бапкер Ғарифулла Бисенбаев жаттықтырады.

Венера МИРЛАН Суреттерді түсірген Талант ҚҰСАЙЫН

[gallery td_select_gallery_slide="slide" ids="40679,40678,40681,40680,40782,40779,40778,40777,40776,40775,40774"]