Бұл туралы Өңірлік коммуникациялар қызметінде өткен баспасөз жиынында айтылды. Әзірге бұл пилоттық жоба ретінде іске асырылып көрмек.
2019 жылғы 1 қаңтардан бастап денсаулық сақтау ұйымдарында бірыңғай медициналық ақпараттық жүйе енгізіліп, қағазсыз жұмыс процесіне көшу қарастырылып жатыр.
Қазіргі таңда барлық денсаулық сақтау ұйымдарында Кешенді медициналық ақпараттық жүйе енгізілген. Әзірге бұл қатарға жөндеу жұмыстарына байланысты облыстық аурухана және техниканың тапшылығына байланысты облыстық жұқпалы аурулар ауруханасы қосылған жоқ.
Брифингте Маңғыстау облысы әкімінің орынбасары Руслан Сакеев, білім басқармасы басшысы Зейнеп Тастемірова, денсаулық сақтау басқармасы басшысының орынбасары Клара Оралбаева қатысты. Жиында өңірдегі денсаулық сақтау және білім саласында атқарылған жұмыстарға қорытынды жасалып, алдағы жылға қойылған жоспарлар таныстырылды.
2018 жылы облыс бойынша бірнеше медициналық орталық құрылысы басталмақ. Атап айтар болсақ, 2 аурухана ұйымының құрылысына жеке инвестициялар тартылған. Олар:
-«НКОК» компаниясы есебінен салынатын облыстық онкологиялық диспансер;
-«Өзенмұнайгаз» АҚ есебінен салынатын Жаңаөзен қалалық орталық ауруханасы;
Айта кетейік, облыста онкологиялық диспансер салу тақырыбы бұған дейін де бірнеше рет қозғалған.
Сондай-ақ жергілікті бюджеттен Маңғыстау ауданы Онды ауылында дәрігерлік амбулатория тұрғызылмақ.
Ал республика қаржысынан Ақтау қаласында 150 орындық ана мен бала орталығы және Мұнайлы ауданында 150 орындық орталық аурухана салынбақ.
Жиында облыстық балалар ауруханасы мен балалар жұқпалы аурулар ауруханасын біріктіру мәселесі де қозғалды.
«Балалардың жұқпалы аурулар ауруханасында өзге науқастардың жатқызылуына байланысты орын тапшылығы байқалып отыр. Стандарт бойынша бұлай болмауы қажет. Бұл мәселені облыс әкімдігі және денсаулық сақтау басқармасы уақытылы қарастыруы қажет еді. Сондықтан қазір қайта ұйымдастыру және балалар ауруханасын жұқпалы аурулар ауруханасымен біріктіру туралы шешім қабылдануда. Қаулы жобасы келісіліп жатыр, ақпан айының басында бұл мәселе шешілетін болады. Осылайша, біз балансты қалпына келтіреміз және пациенттерге арналған бос алаңшалар пайда болады», - деді Маңғыстау облысы әкімінің орынбасары Руслан Сакеев.
Бірлескен жаңа аурухананың мәртебесі толық экономикалық басқару нысанындағы мемлекеттік коммуналдық кәсіпорын болады. Бұл мекеме ақылы қызмет көрсетуге, түскен қаржыны өз бетінше басқаруға, оның ішінде жабдық пен материалдарды жөндеуге және сатып алуға мүмкіндік алады.
Теңге БЕКМҰРЗАЕВА
[caption id="attachment_47024" align="alignnone" width="1024"] сакеев[/caption]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
