Жаңа жекеменшік мектеп ашылды

Жаңа оқу жылында Жаңаөзенде жақсы жаңалық орын алды. Қала мектептерінің қатары жекеменшік «Каспий» зияткерлік мектеп-бақшасымен толықты. - Қалада бұрын 22 мектеп болса, бүгін міне қатарына тағы бір мектеп қосылуда. «Каспий» зияткерлік мектебі Елбасымыздың білім саласын және кәсіпкерлікті дамыту бағдарламаларында берген тапсырмалары аясында жүзеге асырылып отыр. Жеке кәсіпкер І.Қалдаманов мектепті ашу жұмысына 50 млн. теңге қаржы жұмсаған. 20 жаңаөзендікті жұмыспен қамтуда, - деді қала басшысы Е.Әбілов. «Каспий» зияткерлік мектеп-бақша» мекемесі 150 балаға арналған. Биыл 1-сыныптан екі сынып, 2-сыныптан бір сынып ашылған. Мектеп 5 күн, 1 ауысыммен, таңертеңгі 8-ден кешкі 5-ке дейін жұмыс жасайды. Таңертең сабақ өтеді, түсте тынығу сағаты, түстен кейін қосымша сабақтар, әртүрлі шаралар ұйымдастырылады. Мектеп жаңа компьютерлік жүйелермен, заманауи компьютерлік техникалар, интерактивті электронды тақталар, жоғары жылдамдықты интернет, мультимедиялық кабинеттермен жабдықталған. Жеке кітапханасы бар. - Зияткерлік мектеп-бақшада балалар үшін барлық жағдай жасалған. Олардың демалатын, тамақтанатын орны, сабақ оқитын кабинеттері талапқа сай жасақталған. Балалар топтық жүйе бойынша оқытылады. Ұстаздарымыз жоғары, бірінші, екінші санатты педагогтар. Оқулықтар жеткілікті, - дейді, «Каспий» зияткерлік мектеп-бақша» мекемесінің директоры Гүлнар Тәжіқұлова. Аталмыш зияткерлік мектепте мұғалімдер кәдімгі стандартқа сай оқу бағдарламасымен сабақ өтеді. Дегенмен, жекеменшік мектеп басшыларының айтуынша, мұнда пәндер бойынша қосымша сабақтар өткізіліп, білімді тек теория жүзінде ғана емес, тәжірибемен ұштастыруға көбірек мән беріледі. Оған қоса, қазақ, орыс, ағылшын тілдері тереңдетіліп оқытылады. Айтпақшы, ақылы мектепте оқысаңыз, айына балаңыздың оқуына 50- 55 мың теңгеге жуық қаражатыңыз болуы қажет. Тағы оқыңыздар: Мұнайшылар мерекесінде техника тапсырылды - Алға қойған жоспарларымыз жетерлік. Солардың бірі 5,6-шы сынып оқушыларын оқыту. Мұндағы мақсат елімізде Назарбаев зияткерлік мектебіне, «Дарын» мектептеріне, қазақ-түрік лицейлеріне шәкірттерімізді дайындау. Сонымен қатар, мектептің аумағын кеңейтіп, 100 орындық спорттық зал салуды ойластырып жатырмыз. Бірақ, бұл идеяның жүзеге асуы алдағы күннің еншісінде. Ал, оған дейін спорт сабақтары күннің жылы уақытында мектеп ауласындағы гүл алаңында, салқын кездерде «Каспий» педагогикалық колледжінің спорттық залында өткізіледі. Апарып-әкелетін арнайы автобусымыз бар, - деді мектеп иесі І.Қалдаманов. Жалпы, жас ұрпақты білім нәрімен сусындататын болғандықтан мектептің жай, не гимназия, лицей, дарынды балаларға арналған болып бөлінгеніне қарамастан жақсы-жаманы болмайды. Ең бастысы қай жерде де сапалы білім сараланады. Сол себепті де, «Каспий» зияткерлік мектеп-бақша» мекемесі «ұрпағы білімді халықтың болашағы бұлыңғыр болмайды» ұранын ұстанып, жас ұрпаққа сапалы білім мен өнегелі тәрбие беруді алға қойған.

Жаңаөзен-Ақпарат