Облыс орталығындағы «Жастар үйінде» ХІІ облыстық дельфий ойындары өтті. Шараны Маңғыстау облысы жастар саясаты мәселелері басқармасының әлеуметтік тапсырысы бойынша «Жас ұлан» қоғамдық бірлестігі ұйымдастырды. Жас дарындардың талантын ұштайтын өнер сайысына аймақтың бес ауданынан келген мектеп оқушылары қатысты.
-Құрметті жас жеткіншектер, достар! Баршаңызды бүгінгі ХІІ облыстық дельфий ойындарының басталуымен құттықтаймын. Бұл шара бойларында өнерге деген құлшыныстары, қабілеттері бар жас өрендердің талантын ұштауға арналатыны баршаға аян. Бүгінгі шара барысында өнердің 6 түрінен сайысқа түскелі отырсыздар. Баршаңызға сәттілік тілеймін. Өнерлеріңіз өрлей берсін. Тек бәйгенің алдынан көрініңіздер!- деді шараның ашылу салтанатында сөз алған Маңғыстау облысы жастар саясаты мәселелері басқармасы басшысының орынбасары Мирлан Сақтағанұлы.
2005 жылдан бастап Ұлттық Дельфийлік комитет жыл сайын Қазақстан Республикасы Білім және Ғылым министрлігімен бірлесіп, ұлттық жастар Дельфийлік ойындарын өткізіп келеді. Дельфийлік қозғалыс жас таланттарды дамыту мен қолдау үшін қолайлы жағдай туғызумен қатар халқымыздың мәдени құндылықтарын сақтап, өркендетуге бағытталған. Классикадан бастап қазіргі заманға дейінгі өнердің барлық түрін қамтитын Маңғыстау облыстық ұлттық жастар Дельфийлік фестивалі аймақта жыл сайын ұйымдастырылып отырады. Оған қатысушылар, өңірдің барлық аудандарынан келетін жасөспірімдердің санының өсуі - жастардың өнерге деген қызығушылығының артқанын дәлелдейді.
-Жалпы осы конкурсқа қатысуға Маңғыстау облысы бойынша 70-ке жуық ұсыныс келіп түсті. Алайда, сайыс басталар алдында кейбір балалардың қалада болмауына және денсаулық жағдайына байланысты бүгінгі конкурсқа 66 бала қатысып отыр. Сайысқа облысымыздың Жаңаөзен қаласынан өзге барлық бес ауданынының балғындары қатысуда, - деген «Жас ұлан» қоғамдық бірлестігінің директоры Бибігүл Шоданова облыстық байқауда топ жарып, жүлделі орыннан көрінген таланттар Маңғыстаудың атынан күзде Шымкент қаласында өтетін республикалық сайысқа қатысатынын жеткізді. Сондай-ақ республикалық деңгейде жеңімпаз атанғандар халықаралық сайысқа қатысып, ел намысын қорғайтын болады.
Бұл жолы өнер додасында балғындар «Дәстүрлі ән» (өзінің сүйемелдеуімен жеке орындау), «Халық биі», «Ұлттық аспап -домбыра», «Эстрадалық ән», «Бейнелеу өнері» және «Фортепьяно» аталымдары бойынша сайысты. Әр номинацияда екі айналымда өнер көрсеткен балалардың қабілетін облыстық филармонияның кәсіби өнер иелері, музыка саласының мамандары бағалады.
-Бұл жерде ескерте кететін жайт – байқау тамыз айының ортасында өтіп жатыр, ал қазір мектеп оқушыларының көбі жазғы демалыста, жан-жақта қыдырып жүр дегендей. Сондықтан, дәстүрлі ән бойынша – 4 бала және күй тарту бойынша қатысқан балалардың саны - 6 бала, эстрада номинациясы бойынша -7 бала болды. Бұл өте аз көрсеткіш. Әр аталым бойынша кем дегенде қатысушылар саны 10-15 болуы керек еді. Қатысатын балалар саны жоқ емес, бар өлкемізде, тек байқау оқу жылы кезінде ұйымдастырылса, жақсы болушы еді. Байқауды болашақта оқу маусымында ұйымдастырса нұр үстіне нұр болары сөзсіз. Сол кезде байқауға қатысушылардың да, келушілердің саны да көбірек болады,-дейді қазылар алқасының мүшесі, Маңғыстау облыстық филармониясының әншісі Әзімхан Баймағамбетов.
Қазылар алқасының шешімімен «Ұлттық аспап-домбыра» номинациясында І-орынмен Бейнеу ауданының өнерлі өрені Карима Мергенбайқызы, ІІ-орынмен Әйгерім Ахметқызы (Бейнеу ауданы), ІІІ-орынмен Нағима Берікбай (Мұнайлы ауданы) марапатталды.
«Эстрадалық ән» аталымында ең үздік болып танылып, І-орынмен бейнеулік 15 жасар Жансая Юнусова марапатталса, ІІ-орынға Қарақия ауданынан келген Мейрамбек Қылышбек ие болды, ал ІІІ-орын қарақиялық жас әнші Рысгүл Исаеваға бұйырды.
«Дәстүрлі ән» номинациясы бойынша І-орыннан Сандуғаш Мұхамбет (Мұнайлы ауданы) және Айдын Нұрлан (Маңғыстау ауданы), ІІ-орыннан Айжұлдыз Жұмағұлова (Маңғыстау ауданы), ІІІ-орыннан Рахмет Перизат (Маңғыстау ауданы) көрінді. «Халық биі» номинациясында «Қызғалдақтар» би тобы (Түпқараған ауданы), «Жұлдыз» би тобы (Бейнеу ауданы) және «Інжу маржан» би тобы (Мұнайлы ауданы) жеңіске жетті.
Венера МИРЛАН
[gallery td_select_gallery_slide="slide" ids="32902,32905,32906,32904"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
