Ақтауда ұлттық мұнай тасымалдаушы «ҚазТрансОйл» компаниясы қызметкерлері арасында спартакиада өтті. Мұнай тасымалдау саласында еңбек ететін мамандардың спорттағы табыстарын көрсететін дәстүрлі шара биыл компанияның жиырма жылдық мерейтойымен қатар келіп, «Компанияның 20 жылдығына – 20 игі іс» акциясы аясында өткізілді.
«ҚазТрансОйл» АҚ мұндай спартакиаданы өткізуді жыл сайынғы дәстүрге айналдырған. Спартакиаданың басты мақсаты – қызметкерлер арасында саламатты өмір салтын насихаттау, спортқа деген қызығушылықты ояту. Бұл шара компанияның берісі қазақстандық, арысы шетелдік құрылымдық бөлімшелері мен еншілес бірлесе бақыланатын ұйымдардағы қызметкерлердің бір-бірімен танысуына мүмкіндік береді. Ұжымдағы достық қарым-қатынасты және өзара көмек пен қолдауды нығайта түседі. Айта кетерлігі, «ҚазТрансОйл» АҚ қызметкерлері тұрақты түрде жоғары спорттық нәтижелерге қол жеткізіп жүр. Мәселен, биыл маусым айында «ҚазМұнайГаз» ҰК» АҚ компаниялар тобы спартакиадасында спорттың барлық түрінен жүлделі орындарға ие болған.
Ақтауда өткен ауқымды шараға 130-дан аса спортшы қатысты. Спартакиадада барлығы 5 команда жарысқа түсті: Орталық аппарат командасы, компанияның Шығыс филиалының және Батыс филиалының командалары, «Қазақстан-Қытай құбыры» ЖШС командасы, сондай-ақ Грузиядан Батуми теңіз порты мен Батуми мұнай терминалының бірлескен командасы келді.
Қатысушылар үш күн бойы шағын футбол, баскетбол, волейбол, эстафета, үстел теннисі, арқан тарту, кір тасын көтеру және армрестлинг сияқты спорт түрлері бойынша күш сынасты. Олардың барлығы да бұған дейін іріктеу кезеңінен өткен жеңімпаздар болғандықтан, бұл мықтылар жарысқа түскен дода болды.
Спорттық ойындар барысында әр команда жылдамдығымен, белсенділігімен көзге түсе білді. Үш күнге созылған сайыс 16-тамыз күні аяқталып, үздіктер анықталды.
Үстел теннисі бойынша қыздар арасында Шығыс филиалы қызметкері Эльмира Елеусізова, ерлер арасында Батыс филиалы командасының мүшесі Маңғыстау мұнай құбыры басқармасының қызметкері Фархат Ташибаев жеңімпаз атанды.
Волейболдан, эстафета мен кір тасын көтеруден Шығыс филиалы командасының спортшылары ешкімге дес бермесе, «ҚазТрансОйл» АҚ орталық аппаратының командасы баскетболдан үздік шықты. Армрестлинг пен арқан тартудан Батыс филиалы командасының спортшылары өздерінің мықты екенін көрсетті. Ал шағын футболда «Батуми мұнай терминалы» ЖШҚ-ның командасы алдына жан салмады.
Осылайша «ҚазТрансОйл» компаниясының құрылғанына 20 жыл толуымен тұспа-тұс келген спорт мерекесі мәресіне жетіп, командалық есепте шығыс филиалының спортшылары топ жарып, бірінші орынды еншіледі. Спартакиадада екінші орынды батыс филиалының командасы, үшінші орынды орталық аппарат командасы иеленді.
Камшат ОҢҒАЛТАЙ
[gallery td_select_gallery_slide="slide" ids="32720,32721,32723,32722"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
