Елордамыздағы "Экспо-2017" халықаралық көрмесінде 15-18 тамыз аралығы Маңғыстау облысына арналады. Сол күндері көрмеге келушілер өңіріміздің əдебиетімен, тарихи-мəдени құндылықтарымен, рухани мұрасымен танысатын болады. Бүгінгі мəслихат сессиясында аймақ басшысы халықаралық көрмедегі "Маңғыстау күндеріне" дайындық барысына да тоқталып өтті.
-Облысымыздан "Экспо-2017" көрмесіне 500 адам барады деп жоспарланып отыр. Арнайы бағдарлама əзірленді. Кеше мерекелік концерттің дайындық барысына қатысып, жобасын жасақтадық. Маңғыстаудың мəдениет күндерін өткізуге мүмкіндіктеріміз мол. Айгүл Қосанова, Тамара Асар, Ұлықпан Жолдасов сынды өнерпаздарымыз қолдау көрсететін болады. Сонымен қатар, ақын Есенғали Раушанов ағамыздың 60 жылдық мерейтойы да көрме аясында атап өтіледі. Бұдан өзге жаңа, тың дүниелерді ұйымдастыруды да ойластырғанбыз. Түйе жарысын өткізу жайлы ұсыныстар да келді. Бірнеше шаралар жоспарда тұр. Бəріміз бірлесіп жоғары деңгейде өткіземіз деген ойдамын, - деді Ералы Лұқпанұлы.
Сондай-ақ, сессияда сөз алған Маңғыстау облысы əкімінің орынбасары Шолпан Ильмуханбетова шараға бөлінген қаржы көлемін де мəлімдеді.
-Көрме аясында Маңғыстаудың мəдени күндерін өткізуге облыс бюджетінен 220 миллион теңге қаржы бөлу жоспарланды. Жалпы 40-қа жуық шара өткізіледі, - деді ол.
Теңге БЕКМҰРЗАЕВА