Аймақ тұрғындарына наркологиялық көмек облыстық наркологиялық диспансерімен көрсетіледі. Мұнда аусымында 55 адам қабылдайтын диспансерлік бөлімше және 160 төсек-орындық стационар бар. Оның ішінде 80 орын ересек адамдарды ерікті емдеуге арналған стационар, оның 60 төсек-орыны наркологиялық ауытқулары бар науқастарға арналған.
-80 төсектік мәжбүрлеп емдеу бөлімшесі, оның ішінде 60 төсек ер-азаматтарына арналған және 20 төсек әйелдер үшін жасақталған, қазіргі уақытта ықшамдалған. Ақтау және Жаңаөзен қалаларында уақытша бейімдеу және уытсыздандыру орталығымыз да жұмыс жасайды... Жыл басынан бері есірткіге қарсы күресті күшейту мақсатында облыс көлемінде көптеген шаралар жүргізіледі. Мектептерде, жоғары оқу орындарында әр түрлі бағытта кездесулер өтті. Есепте тұрған ата-аналармен кездесіп, түсіндіру жұмыстарын жүргіздік. Мұндай жұмыстар алдағы уақытта да жалғасын табатын болады. Жалпы қоғамда өз еркімен келіп, емделіп, есірткіні мүлдем тастағысы келетін адамдар да кездеседі, өкінішке орай олардың саны өте аз. Бізден келіп ем алған азаматтарды біз квота арқылы Павлодардағы оңалту орталығына жіберіп отырамыз,-дейді облыстық наркологиялық диспансерінің басшысы Күләш Қаражанова.
Стационарлық ем алуға науқастар диспансерлік бөлімше дәрігерінің, қала және аудандық медициналық-санитариялық алғашқы көмек көрсету ұйымдары дәрігерлерінің, сонымен қатар сот-наркологиялық комиссиясының жолдамасымен келеді. Өткен жылдың алты айында 38 науқас емделген болса, биылғы жылы 22 есірткіге тәуелді науқас стационарлық ем алған. Мамандардың айтуынша, нашақорлықты емдеу кешенді әрі ұзақ дәрі-дәрмектік, психотерапиялық, психолгиялық көмек оңалту іс-шараларынан тұрады. Бөлімшелерде психолог мамандар психологиялық диагностика жүргізумен және кеңес берумен айналысады. Дәрі-дәрмектер кезеңі аяқталғаннан кейін науқастар оңалту кезеңдеріне өту керек. Жоғары мамандандырылған ем алу үшін тегін медициналық көмектің кепілдік берілген көлемі шеңберінде науқастар психикалық денсаулықтың республикалық ғылыми-практикалық орталығының Павлодар қаласындағы филиалына жолданады. Жалпы жыл басынан бері Павлодардағы орталыққа 4 науқас жіберілген.
-2014 жылдан бастап пилоттық жоба шеңберінде халыққа қызмет көрсету орталығында автокөлік жүргізу құқығын алу үшін мамандандырылған медициналық тексеру жұмыстары енгізілді. 2017 жылдың алты айлық есебі бойынша автокөлік жүргізу куәлігін алу үшін 6447 адам тексерілген, оның ішінде 26 адамның есірткі заттар пайдаланатыны анықталып, 25-і профилактикалық бақылауға алынды. 2016 жылдың алты айлық есебі бойынша - 6173 адам, оның ішінде зәрін зерттеу кезінде есірткіге оң нәтиже көрсеткен 16 адам, профилактикалық бақылауға 10 алынды - деген Күләш Қаражанова жыл басынан бері 305 адам диспансер есебінен шығарылғанын, оның ішінде 80 адам толықтай жазылып шыққанын айтты.
Венера МИРЛАН
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
