Маңғыстау - Астрахань пойызының жолсерігі 9 айлық нәрестені «тірілтті»

Маңғыстау-Астрахань пойызының жолсерігі Алтынай Рамбаева 9 айлық Фатима Хапизулланың өмірін сақтап қалды. Ол баланың 40 минут бойы дем ала алмай тұншыққанын есіне алады, алайда жолсерік нәрестенің қайтадан тыныс алуына септігін тигізді, деп жазады Lada.kz.

Алтынай Рамбаева 3 шілде күні әдеттегідей рейске шығып, Астраханьнан Маңғыстауға бет алған жандарға жолсерік болды. Мақат станциясында пойызға тағы да жолаушылар кірді.

«Мақаттан өте бергенде, екінші купеден бір әйел жүгіріп келіп, қасындағы әйелдің баласының қайтыс болғандығын хабарлады. Мен тездете барып қарасам, сәби ес-түссіз жатыр. Тамырының соғуын, тыныс алуын тексердім... Бүлдіршін көкпеңбек болып кеткен. Мен оны өзімнің қызметтік бөлмеме алып келіп, қайтадан тыныстауы үшін барлық жағдайды жасадым», - дейді Алтынай Рамбаева.

Ол тоғыз айлық Фатиманың бетіне су бүркіп, есін жиғызу үшін арқасынан ұрды.

«40 минуттан кейін нәресте оянған кезде мен қуанғанымнан жылап жіберіп, «Оян! Оян!» деп айқайладым. Одан кейін Құлсары станциясына жеткенге дейін бүлдіршінге бірнеше жаттығулар жасаттым, содан кейін ол тыныс алып, жылай бастады. Менің бақытымда шек болған жоқ», - дейді Алтынай Рамбаева. Құлсары станциясында Фатима мен оның анасын дәрігерлер алып қалды. Алтынайдың айтуынша, қазіргі уақытта баланың жағдайы жақсы.

Дереккөз: ҚазАқпарат

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.