Бүгін, 14 наурыз күні ҚР Премьер-Министрі Бақытжан Сағынтаев пен ҚР Президент Әкімшілігі басшысының бірінші орынбасары Марат Тәжин арнайы жұмыс сапарымен Маңғыстау облысына келді. Астаналық қонақтар облыстық мәслихаттың кезектен тыс сессиясына қатысып, Маңғыстау облысы әкімінің лауазымына Тоғжанов Ералы Лұқпанұлының кандидатурасын ұсыну туралы Мемлекет басшысының хатын оқып берді. Депутаттар Президент ұсынған кандидатураны бірауыздан мақұлдады.
Мұнан кейін ҚР Премьер-Министрі Бақытжан Сағынтаев пен ҚР Президент Әкімшілігі басшысының бірінші орынбасары Марат Тәжин облыс активімен жиын өткізіп, аймақтың жаңа басшысын таныстырды.
- Ардақты ағайын, алдымен баршаңызды амал мерекесімен құттықтаймын. Бүгін алдарыңызға Елбасының аманатын арқалап келіп отырмыз. Облыстық мәслихаттың кезектен тыс сессиясын өткізіп, Алик Серікұлының басқа қызметке ауысуына байланысты, Елбасы ұсынған азаматты таныстырғалы келдік. Мемлекет басшысының Жарлығымен Ералы Тоғжанов Маңғыстау облысының әкімі болып тағайындалады. Бұл азамат көп жылдар басқару органдарында абыройлы қызмет атқарған тәжірибелі маман. Елдің әлеуметтік, экономикалық жағдайын жіті біледі. Сондықтан да өздеріңізбен тығыз қарым-қатынаста қызмет атқарады деп ойлаймын. Және де Мемлекет басшысының сенімін ақтап, өңір алдына қойылған тапсырмаларды табысты жүзеге асыратынына сенімдімін,-деген Бақытжан Сағынтаев өңірдің бұрынғы басшысы Алик Айдарбаевқа жасаған жұмыстары үшін алғысын айтып, табыс тіледі.
Сондай-ақ, Үкімет басшысы облыс әкіміне Елбасының «Қазақстанның үшінші жаңғыруы: жаһандық бәсекеге қабілеттілік» атты Жолдауында қойылған тапсырмаларды және ірі реформаларды жүзеге асыру бойынша бірқатар тапсырмаларды жүктеді.
Өз кезегінде Маңғыстау облысының жаңа әкімі Ералы Тоғжанов көпшілік алдында ант қабылдап, Елбасының, халықтың сенімін ақтауға уәде берді.
Тоғжанов Ералы Лұқпанұлы 1963 жылы 13 мамырда Батыс Қазақстан облысында дүниеге келген. Жоғары білімді: 1983-1988 жж. Е.А. Бөкетов атындағы Қарағанды мемлекеттік университетінін құқықтану және 1991-1994жж. ҚР Ғылым Академиясының Мемлекет және құқық институтын заңгер мамандығы бойынша тәмамдаған. Кеңес одағының әскер қатарында қызмет еткен. 1991 жылдан 1998 жылға дейін Е.А. Бөкетов атындағы Қарағанды мемлекеттік университетінің Мемлекет және құқық теориясы мен тарихы кафедрасында оқытушы қызметін атқарған. 1994-1996 жж. ҚР Ғылым Академиясының Мемлекет және құқық институтында ғылыми қызметкер. 1996 жылдан бастап Қазақ гуманитарлық заң университетінің Мемлекеттік қызмет және халықаралық құқық факультетінің аға оқытушысы, декан орынбасары қызметін атқарған. 1994 жылдан бастап аталған университеттің халықаралық құқық факультетінің деканы болып жұмыс істеген. 1999 жылы филиал деканы, 2001 жылы Астана қаласының Қазақ гуманитарлық заң университетінің Құқық және мемлекеттік қызмет институтының директоры болып еңбек еткен. 2001-2006 жж. Қарағанды облысы әкімінің орынбасары. 2006-2008 жж. Қазақстан Республикасы Әділет министрлігі Дін істер комитетінің төрағасы болып жұмыс істеген. 2008 жылдың қаңтарында Қазақстан Республикасы Президенті Өкімімен Қазақстан Республикасы Президент Әкімшілігінің Қазақстан халқы Ассамблеясы Хатшылығының меңгерушісі болып тағайындалып, қызметін абыроймен атқарған. Саясаттану ғылымдарының докторы.
II дәрежелі «Достық» ордені және «Ерен еңбегі үшін» медалімен марапатталған.
Венера МИРЛАН Суреттерді түсірген Серік МАЙЕМЕРОВ
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
