Аутизмді жеңеміз!

Маңғыстау облысының орталығында алғаш рет аутизммен ауыратын балалар мен олардың ата-аналарына арналған екі күндік тегін семинар өтті. Семинар «Қайырымдылық» қорының «Аутизмді жеңеміз: Қазақстанның 12 қаласы» жобасы аясында ұйымдастырылды. Жоба мамандары аутизмммен ауыратын балалармен Қазақстанда 2008 жылдан бері жұмыс жасайтындытарын айтады. Мұндай семинар бұған дейін еліміздің Қарағанды, Павлодар, Орал, Көкшетау, Қостанай, Петропавл қалаларында ұйымдастырылған. Алдағы уақытта Атырау мен Шымкент өңірлерінде өткізілмек.

Ақтауда өткен шарапатты шараға аймақтан 200-ге жуық ата-ана қатысып, білікті мамандардан тегін кеңес алды.

- Біз аутизмге душар болған балаларды әлеуметтік тұрғыдан бейімдеуге және олардың толыққанды өмірін қалыптастыруға көмектескіміз келеді. Қордың мақсаты-елімізді әлемдік деңгейдегі оңалту бағдарламасымен қамтамасыз ету. Сондықтан да біз бүгін Ақтау қаласында екі күндік семинар өткізіп жатырмыз. Алғашқы күні ата-аналарға кішкентай балалармен қалай жұмыс жасау керектігін, қалай баланы ортаға бейімдеу керектігін үйретеміз. Баланың ойын бөлу үшін әр түрлі бағытта ойындар ойнатамыз. Екінші күні үлкен балалармен жұмыс жасауды және ата-аналарға шеберлік сабақтарын өткіземіз. Алдымен ата-ананың балаға көзқарасы дұрыс болу керек. Қоғамнан оқшауламай, ортаға тартуға жұмыстану керек. Көп ата-аналар аутизммен ауыратын балаларын жасырады, ортадан ұялады, тіптен көп жағдайда балаларын тастап та кетіп жатады. Аутизм-медициналық емес, әлеуметтік проблема. Және де бұл аурудан баланың құлан-таза жазылып кетуіне тек ғана анасы көмектесе алады. Сол себептен де біздің басты мақсатымыз осы шара арқылы балалар мен ата-аналарға ең заманауи оңалту, түзету және консультациялық көмектер беру, - деген «Аутизмді жеңеміз: Қазақстанның 12 қаласы» жобасының үйлестірушісі Салтанат Мұрзалинова-Яковлева 2008 жылдан бері жүйелі жұмыстың нәтижесіде 17 баланың аутизмнен толықтай жазылып, ортаға қосылғанын жеткізді.

«Аутизм» латын тілінен аударғанда–«іштей тұйықталу» дегенді білдіреді. Аталмыш дертке шалдыққандар томаға тұйық, ешкіммен тілдеспей «өздерінің әлемінде» өмір сүреді. Сондықтан да ауруды уақытылы анықтап, бала кезден емдесе нәтижелі болмақ.

- Балаларымыз қазір тірі байланыстан гөрі, ватсап пен әлеуметтік желілерде көп отырады. Сол себептен ол басқа баланың көзіне қарамағандықтан, онымен қарым-қатынаста болып, ойнамағандықтан, басқа адамды қабылдау жүйесі жолға қойылмайды. Статистикалық мәліметтерге сүйенсек әлемді өмірге келетін әрбір қырқыншы бала аутизммен ауырады. АҚШ-тың зерттеу орталығының болжамы бойынша 2050 жылға қарай әлемдегі әрбір екінші сәби аутизммен дүниеге келмек. Бұл қорқынышты жағдай. Сондықтан да аталған дертті біз ауыздықтауға, алдын алуға қазірден бастап жұмыстануымыз керек деп есептеймін. Әйел адам жүктілікті жоспарлап, жүктілік кезінде денсаулығына көп көңіл бөлуі тиіс, - дейді Салтанат Мұрзалинова-Яковлева.

Аутизммен ауыратын сегіз жасар баланың анасы Света семинардың облыс орталығында ұйымдастырылатынын естіп арнайы келіпті. Қарағандыда өткен арнайы оқудан білімін жетілдіргеннен кейін де, баласының бойында өзгерістер бола бастағанын айтады.

- Біз Ақтау қаласынан аутизммен ауыратын балалар мен ата-аналарға арналған арнайы қауымдастық құрдық. Күнделікті бектіліген кестеге сай 19 ата-ана жиналып, балаларымызбен жұмыс жасаймыз, бір-бірімізбен тәжірибе алмасамыз. Түске дейін баланың анасымен, кешкісін әкесімен екі сағат жұмыс жасаймыз. Мен өзім Қарағанды қаласына барып, арнайы курстан өтіп келдім. Сол алған білімімді осы жердегі ата-аналармен бөлісемін. Баланы үйде ойнатып, оқшау ұстағаннан ортаға әкеліп, көпшілікпен ойнауға, ортаға бейімделуге үйреткен дұрыс деп есептеймін. Сонда ғана ем нәтижелі болады, бала да «өз әлемінен» қоғамға орала бастайды, - дейді Света Қожаева.

Венера МИРЛАН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.