Ел Тәуелсіздік тұғырына орныққалы 25 жылдың жүзі болды. Сынаптай сырғыған уақыт ішінде сан салада оңтайлы өзгерістер орын алып, «көмескі» жүйе жаңғыртылып, тұтас қаңқасы қайта құрылған еді. Жасампаз істер мен нәтижелі жобалар жүзеге асырылып, заң қағидалары қайта қаралып, тиісті әрі тиімді қаулылар қабылданды. Әсіресе, денсаулық сақтау саласы, отандық дәрі-дәрмек өндірісі нарығында іргелі де ілкімді істер атқарылды. Әр өңірде әлеумет әлеуеті, қоғам құрылымы мен өмір сүру сипатына қарай медицина жүйесі жаңашылдыққа бет бұрып, халыққа қызмет көрсету сапасын арттыру және кәсіби білім мен білікті жетілдіру жолдары іздестірді. Бұл үрдіс біздің өңірде, яғни Маңғыстау облысында жемісті жалғасып келеді. Бұған мысал ретінде дәрілік саясатты дамыту мақсатында өткен өңірлік конференцияны атауға болады.
«Өңірлік конференция Маңғыстау облысы бойынша медициналық және фармацевтикалық қызметті бақылау департаменті бастамасымен ұйымдастырылды. Алматы қаласындағы С.Ж. Асфендияров атындағы Қазақ ұлттық медицина университеті мен Оңтүстiк Қазақстан Мемлекеттiк Фармацевтикалық академиясы мамандары, профессорлар мен ғылым докторлары дәріс оқып, дәрі-дәрмектер, медициналық мақсаттағы бұйымдар мен медициналық техникаларды қолдану, сақтау және босату жөнінде талаптар мен ережелерге тоқталды. Сонымен қатар, дәріханалық тиісті фармацевтикалық практика стандарттары және оларды фармацевтикалық нысандар қызметіне енгізу жайы сөз болды», — дейді Маңғыстау облысы бойынша медициналық және фармацевтикалық қызметті бақылау департамент басшысының орынбасары Дәулет Тагибаев.
Оның сөзіне сүйенсек, биыл жүргізілген мониторинг нәтижесінде өңірде фармацевтикалық қызмет жүйесіндегі бөлшек сауда жақсы дамығандығы мәлім болды. Дәрі-дәрмек өндіру және сату саласында қызмет ететін фармацевт мамандармен қоса өңірлік конференция жұмсына жергілікті атқарушы орган өкілдері өз қызығушылығын танытты. Облыс әкімінің орынбасары Бану Нұрғазиева, өңірлік денсаулық сақтау басқармасының басшысы Марал Қадыр білікті мамандар мен кәсіби білімін жетілдіруді көздеген фармацевт-мамандармн жүздесіп, алдағы мақсат-жоспарларды ортаға салды.
«Фармацевтика – медицинаның ең ауқымды саласы. Бүгінде медицинадағы жеке кәсіпкерлікті дамыту мәселесі бас көтеріп отыр. Фармацевтика саласында жеке кәсіпкерлікті дамытуға оңтайлы нәтижелер бар. Алдағы уақытта міндетті әлеуметтік медициналық сақтандыру жүйесіне бет бұрғалы жатырмыз. Сол кезде де фармацевтика саласына зор сенім артамыз», — деді Марал Қадыр.
Басқосуда фармацевт-мамандар қызметінің қоғамдағы рөлі, өңірлік әкімдік және басқарма тарапынан олардың еңбегін бағалау жайы сөз болды. Халықтың ауру дендеп, бас аурып, балтыр сыздағандағы бір сенері білікті дәрігер болса, бірі дәріханадағы фармацевт екендігін ескере кетті. Сол себепті де дәрі-дәрмек, медициналық мақсаттағы бұйымдар турасында дәйекті ақпар беріп, дұрыс бағдар берер фармацевттердің кәсіби білімін жетілдіру маңыздылығы атап өтілді.
Голрох Жеменей
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
