АИТВ/ЖИТС инфекциясын жұқтырған адамдар елімізде аз емес. Және жылдан жылға көбейіп келе жатқаны ащы да болса шындық. Мысалы, биылғы сегіз айдағы ахуалға көз жүгіртсек, ЖИТС-тің алдын алу және оған қарсы күрес жөніндегі облыстық орталықта АИТВ инфекциясын жұқтырған 15 адам тіркелген. Олардың ішінде ҚР азаматтары—11, шетелдік азаматтар—3, ал анонимді тексерілгені—1.
Өткен жылдың осы кезеңінде АИТВ инфекциясының 14 жағдайы, оның ішінде ҚР азаматтары арасында 10 жағдай, шетелдіктер арасында 4 жағдайы анықталған болатын.
АИТВ жұқтырғандарды аумақтарға бөліп қарасақ, Ақтау қаласының тұрғындары арасында 10 адам, Мұнайлы ауданында 1 адам, Бейнеуде 1 адам, шетелдік азаматтар арасында 3 адам тіркелген.
Өкінішке орай, 21-49 жас аралығындағы топтар арасында да АИТВ инфекциясы анықталған. Ағымдағы жылғы 1-қыркүйекте облыста 15-49 жастағы азаматтар арасында таралуының өсіңкі көрсеткіші 0,05% критериі жағдайында 0,036% құрап отыр.
Жыныстық бөлініс бойынша АИТВ инфекциясы әйелдерге қарағанда, ерлер арасында жиі кездеседі, ара-қатынасы—2:1.
Ал әлеуметтік-кәсіптік құрамы бойынша талдағанда, АИТВ инфекциясының жұмыс істейтін адамдар арасында да, сонымен қатар жұмыс істемейтін адамдар арасында да анықталғанын көрсетіп берді.
Инфекцияның кездейсоқ, бұрыннан таныс емес адамдармен болатын жыныстық гетеросексуалды жолмен берілуі көбірек орын алуда.
АИТВ инфекциясының вирусын тасымалдаушы екендігі анықталғандардың барлығымен тестіге дейінгі және тестіден кейінгі кеңес беру шарасы өткізілді. Оларға құқықтары мен міндеттері түсіндірілді, жақын байланысатын адамдары тексеріліп-қаралды. АИТВ жұқтырылғандар диспансерлік есепке алынды.
Ж.МАХАМБЕТҚАЛИЕВА ЖИТС-тің алдын алу және оған қарсы күрес жөніндегі облыстық орталықтың эпидемологиялық бөлім меңгерушісі
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
