Ақтауда бір аптада індеттен 56 адам көз жұмды

Бұл туралы Ақтау қаласындағы модульдік инфекциялық аурухана эпидемиологы Мерей Сисенов мәлімдеді, - деп хабарлайды mangystaumedia.kz.

Дәл қазіргі уақытта Ақтау қаласындағы провизорлық орталықтар мен модульдік инфекциялық ауруханада барлығы 578 адам ем қабылдап жатыр. Оның ішінде 58-і ауыр жағдайда жансақтау бөлімінде.

Бүгін модульдік ауруханада ауыр халде жатқан науқастардың жағдайын Ақтау қаласының әкімі Нұрдәулет Қилыбай біліп қайтты. Модульдік аурухана басшысы Айнагүл Сейітжанқызының айтуынша, өте ауыр жағдайдағы науқастар вакцина алмаған. Ал вакцинаның бірінші компонентін алған адамдар орташа деңгейде ауырып жатыр.

Модульдік инфекциялық ауруханаға вакцина алған науқастар да түсіп жатыр. Бәрі екпенің бірінші компонентін алған соң бір апта ішінде ауырған. Олар антидене қалыптаспаған уақытта вирус жұқтырған адаммен байланыста болған болуы мүмкін. Өйткені қазір вирус тасымалдаушы адам өте көп. Вакцина алып ауруханаға түскендер жазылып шығып жатыр. Десе де, қосымша қант диабеті мен жүрек-тамыр патологиясы секілді аурулары асқынған адамдар қайтыс болды, - дейді Айнагүл Сейітжанқызы.

Ал жағдайы жақсарған науқастар коронавирусқа қарсы екпе алмағандарын айтып, індетпен күресіп жүрген дәрігерлердің жанкешті еңбегіне алғыс білдірді.

Айта кетейік, Ақтаудағы модульдік аурухана 200 орынға арналған. Ал қазіргі уақытта ауруханада 235 адам ем алып жатыр. Алғашында жансақтау бөлімі 20 адамға есептелсе, қазір онда дәрігерлер үш есе науқастың өміріне араша түсіп жатыр.

Бір оттегі баллоны қалыпты жағдайда бір жарым сағатқа жету керек болса, қазіргі жағдайда 40 минутта таусылып қалады, - дейді эпидемиолог Мерей Сисенов.

Ал оттегі баллондарын қазір кәсіпкерлер, еріктілер мен спортшылар жеткізіп көмек қолын созып жатыр. Айта кетейік, модульдік ауруханада өте ауыр халдегі науқастар ем қабылдайды. Ал жағдайы жақсарған адамдар провизорлық орталыққа ауыстырылады. Провизорлық орталықтар да науқасқа толы.

Махаббат Нұржанқызы

Суреттер автордан

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.