Маңғыстау облысының әкімі қазақтың аса көрнекті ақыны, ҚР Мемлекеттік сыйлығының лауреаты Есенғали Әбдіжаппарұлы Раушановтың 64 жасқа қараған шағында мезгілсіз өмірден өтуіне байланысты отбасы мен ағайын-туыстарына көңіл айту жеделхатын жолдады.
“Ағамыз алты алаштың құрметін иеленіп, ықыласына бөленгеніне ел куә. Есенғали Әбдіжаппарұлы саналы ғұмырында талай алыптармен бір қазанда қайнап, ел игілігі жолында жемісті еңбек етті. Қазақ баспасөзі мен поэзиясының дамуына сүбелі үлес қосып, талай жас қаламгердің қанатын қатайтты.
Шығыстық сарында жазылған өлеңдері мен жыраулық поэзия дәстүріндегі дүниелері замана ақиқатын көркемдік тұрғыда ашып көрсетуде азаматтық үнімен ерекшеленді. Е.Раушановтың халықтық аңыз, мифологиялық желіде жазылған «Ғайша бибі», «Түн деген Көрұғлы», «Нұқ пайғамбардың кемесі», т.б. туындылары кемел көркемдігімен ерекшеленген құнды шығармалар.
«Жақсының аты өлмейді, ғалымның хаты өлмейді» демекші, жақсы ағаның асыл бейнесі, есімі мен еңбегі әр маңғыстаулықтың көңіл төрінде мәңгі сақталмақ. Маңғыстау жұртының атынан ағамыздың отбасы мен жақындарына қайғыра көңіл айтамын.
Алла алдынан жарылқасын. Нұры пейіште шалқысын”,-деді С.Трұмов.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
