Ер Лабаққа ескерткіш тақта орнатылды

«Рухани жаңғыру» бағдарламасы аясында тарих қойнауында жатырған ерлерімізді анықтап, елдігімізді танытуға негізделген шаралар жүзеге асуда.

Жуырда «Ескі Бейнеу» қо­рымының іргесінен тәуелсіздік дәуірінде бөлінген «Батыр­лар алаңына» ерлігі аңызға айналып, есімі ғасырлар бо­йы ел жадында сақталған ер Лабақ Жиенқұлұлының ұрпақтары еңселі ескерт­кіш тақта (стелла) орнату сал­танатын ұйымдастырды. Жиынға облысымыздың ор­талығы Ақтау қаласында, ауданымызда тұратын, ата салтымызға сай ынтымағы зор, қонысы бөлек болса да тілегі бөлінбеген Құнанорыс ұрпақтары, еңбек ардагерле­рі, үкіметтік емес ұйымдардың өкілдері мен қоғам белсен­ділері қатысты.

Жиында сөз бастаған Бейнеу ауданының құрметті азаматы Б.Әзірханов алғашқы рет 2016 жылы Есек мерген мен Атағо­зы батырдың ескерткіш тақта­сы орнатылған алаңға биыл ер Лабақтың еңселі ескерткіш тақтасының (стеласының) бой көтеруі бүгінгі қоғам мен бо­лашақ ұрпаққа ғибраты мол игі шара болғандығын айтып, көпшілікті құттықтады. Одан кейін сөзге шыққан бүкіл еліміз­ге танымал ақын Сабыр Адай көпшілікке өз ойынмен ұсыныстарын жеткізді.

- Атағозы батыр он сегізінші ғасырдың алғашқы жартысындағы «Ақтабан шұбы­рынды» заманында, Сауран айналған аталарымызды ежелгі атажұртымыз Маң­ғыстау жеріне қайыра қоныстандыруға асқан ержүректікпен батыл қадам таста­уымен тарихтан ойып орын алған сүлей батыр. Атағозы батыр Айтқұлұлының 40 мыңдай қазақ, қарақалпақ сарбаздары­нан құралған жасақпен Үстірт, Жем­-Сағыз бойын басқыншылардан азат етіп, қалмақтарды Еділден ары асырып, қал­мақ ханы Церен Дондуктің жасағын күй­рете жеңгені жайлы деректер Ресей мұра­ғаттарында сақтаулы. Ендеше, он сегізінші ғасырдың басында өмірге келген атамыз ер Лабақ Атағозы батырдың сенімді жа­уынгер інісі, ол басқарған жасақтың ерен ері, жүрекжұтқан сүлей батыры болғаны анық. Бұған жорық ақындарынан бізге құн­ды мұра болып жеткен жалынды жырлар куәлік етеді. Атоғозы батыр:­«Лабақта үш батырдың жүрегіндей жүрек, үш палуанның қайратындай қайрат, күрең тұлпарда үш аттың қайраты, төзімділігі, шабысы бар»,­ деген сөзді айтуы жайдан­-жай емес,­ - деді ол. Ұлтжандылығымен бүкіл қазақ елінің сүйіспеншілігіне бөленген саңлақ азама­тымыз, арқалы, ақиық ақынымыз сөзінің соңында ер Лабақ атамызға арнау өлеңін асқақ рух, зор шабытпен оқыды.

Жиында сөз алған ақтаулық Бақтыбай ата Жолдасбаев, Ақмұрат Өтепов, Көптілеу ақын Ізтұрғанұлы, бейнеулік Тайыр Дәрментаев, Мәтжан Нұрмағанбетов сөз сөйлеп, батыр ұрпағы Бейсен Нығметұлы өлең оқып, жұртшылықты жігерлі әсерге бөледі.

Ер Лабаққа ескерткіш тақта орнату Бей­неудегі Құнанорыс ұрпақтарының бүгінгі ақылман абыз атасы, жасы 90-ға таяған Мәтжан аға Нұрмағанбетовтың ұсыны­сымен қолға алынған болатын. Құрылысты көптеген ізгі шараларды сәтті жүзеге асы­рудың басы-­қасында жүрген ауыл бел­сендісі Тайыр Дәрментаев бастаған топ өкілдері шеберлікпен қарқынды жүргізіп, қысқа мерзімде аяқтап, төңірегіне гүл егіп абаттандырды. Ескерткіштің бой көтеруіне Құнанорыс ұрпақтары арасындағы қолы ашық жомарт азаматтар демеушілік жаса­ды.

Ескерткіш тақта алдындағы жиыннан кейін ер Лабақ рухына арнап садақа беріліп, Құран қатым етілді. Қонақтар мен ауыл ақсақалдарына салт­-дәстүрімізге сай сый­құрмет жасалды.

Қартбай ҚОЖАЕВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.