Қазақ күресі мектеп бағдарламасына вариатипті пән ретінде енгізілмек

Бұл туралы қоғамдық коммуникациялар орталығында өткен брифингте ҚР қазақ күресі федерациясының бас хатшысы Бақдәулет Сәбитов айтты, - деп хабарлайды mangystaumedia.kz сайты.

Қазақ күресі 5-11 сынып оқушылары үшін вариатипті пән ретінде, ал 1-4 сыныптарға акробатикалық жаттықтыру түрінде қосылады. Алдағы 5-6 жылдықта қазақ күресін міндетті үшінші сабақ ретінде қою қолға алынып отыр.

Мектеп бағдарламасында пилоттық жоба ретінде қосылатын қазақ күресінің дәрістері алдымен Нұр-Сұлтан қаласында жүзеге асады. Маңғыстау облыстық қазақ күресі федерациясының президенті Аббат Өрісбаев та өңірде ұлттық спортты жаңғырту мақсатында бұл пәнді мектеп бағдарламасына қосуды құптап отыр.

- Бір тоқсанда 27 сабақ дене шынықтыру пәні болса, соның 7-8-і вариатипті қазақ күресі сабағы болады. Бұл сабақта қыздарға шектеу жоқ. Осы жылдың қыркүйек айынан бастап ұлттық спортты мектеп бағдарламасына қосып, алдағы уақытта балаларымыздың қазақ күресінен бұдан да жоғары биіктен көретіндеріңізге сендіргіміз келеді, - деді Бақдәулет Маратұлы.

ҚР қазақ күресі федерациясының бас хатшысының айтуынша, осы жылдың соңына дейін қазақ күресі академиясын құрылады. Академия тек қана қазақ күресінің мамандарын дайындамақ. Сонымен қатар, академия құрамы өңірлерге барып мамандарға біліктілікті арттыру курстарын өткізуді жоспарлап отыр.

Айта кетейік, бұдан 7 жыл бұрын да қазақ күресін мектеп бағдарламасына енгізу туралы ұсыныс айтылған еді.

Махаббат НҰРЖАНҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.