Маңғыстауда волейболдан ашық біріншілік өтіп жатыр

Ақтауда алғаш рет «Ақтау волейбол клубы» қоғамдық бірлестігінің бастамасымен ерлер командалары арасында волейболдан ашық біріншілік өтуде. Былтыр қазан айында басталған жарыс осы жылдың сәуір-мамыр айларында аяқталады. Жарыс екі жас категориясы – 40 жасқа дейін және 40 жас және одан жоғары ардагерлер командасы арасында өтеді. Бірінші айналымда 10 команда өнер көрсетті, ал екінші санат бойынша 5 команда өтінім берген. Бірінші айналым қорытындысы бойынша «ВК Ақтау» командасы шағын кубок иегері атанды. Біріншіліктің жеңімпазы екі айналым қорытындысы бойынша анықталады. Осы жоба аясында келесі ойын Маңғыстау облысының дене шынықтыру және спорт басқармасының қолдауымен «Орбита» спорт кешенінде Кеңес әскерлерінің Ауғанстаннан шығарылғанына 30 жыл толуына орай ардагерлер командалары арасында өтеді. «ВК Ақтау»  ҚБ турнир аясында Ауған соғысы ардагерлері мен волейболшылармен бірге еске алу шарасын өткізуді жоспарлап отыр. Сондай-ақ 8–10 ақпан күндері Атырау қаласында Д.Қонаевты еске алуға арналған волейболдан жыл сайынғы халықаралық турнир өтеді. Жарысқа облыс атынан қатысатын командаға сәттілік тілейміз.

Шарбану ӘРІП