Ақтауда дзюдодан халықаралық турнир мәресіне жетті

Бірлік күні 1-шағынаудандағы «Теннис корты» спорт кешенінде дзюдо күресінен 2001–2003 және 2004–2006 жылы туған жас- өспірім ұл-қыздар арасында халық батыры «Ер Қосай Құдайкеұлын» еске алуға арналған X халықаралық турнир өткізілді. Бұл турнир осыдан он жыл бұрын бастау алып, жыл сайын 800-ге жуық жасөспірімдердің басын бір арнаға тоғыстырып жас буынға үлкен мүмкіндік сыйлауда. Мереке күні өткен жарысқа 600-ге жуық спортшы қатысқан дода 2 күнге созылды. 

Жарыста көршілес Арме­ния, Әзірбайжан, Гру­зия, Қырғыз мемлекет­терінен және Атырау, Ақтөбе, Батыс Қазақстан, Жамбыл, Қызылорда, Оңтүстік Қазақстан, Қарағанды, Шығыс Қазақстан, Маңғыстау, Ал­маты облысынан және Алматы, Ас­тана қалаларынан сайыскерлер бақ сынасты.

Спортшылар толағай табыс жә­не сәттілік тілеу үшін ортаға Маң­ғыстау облысы әкімінің орынба­сары Мақсат Нұрлыбекұлы және де дзюдо күресінен Қазақстан Рес­публикасының мемлекеттік жат­тықтырушысы Жандос Абумута­лифұлы, Маңғыстау облыстық «Жас батыр» мамандандырылған балалар мен жасөспірімдер спорт мектебінің басшысы Манарбек Жұбатқанұлы шақырылды.

Жиынға қатысушыларды құт­тықтау тілегімен ашқан Мақсат Нұрлыбекұлы Маңғыстау облы­сында дене шынықтыру мен спорт­ты дамытуға қосқан елеулі үлесі үшін Нұрпейіс Сәрсенбай, Айдос Түйебаев, Руслан Бимағамбетов, Сұңғат Мұңалбаев, Сәттібек Байпа­қов, Асқар Тыныштықов, Айгерім Тоқсанбекті марапаттады.

Өз кезегінде Жандос Абумуталиф­ ұлы дзюдо федерациясының ұйға­рымымен берілген ІІІ данмен жә­не Қазақстан Республикасының спорт және дене шынықтыру іс­тері комитетінің алғыс хатымен Қуанышбек Мамайұлын, Қазақстан Республикасының спорт және дене шынықтыру істері комитетінің алғыс хатымен Талғат Аманжолұлын мара­паттады.

Марапаттау рәсімін Маңғыстау облыстық «Жас батыр» мамандан­дырылған балалар мен жасөспірімдер спорт мектебінің басшысы Манарбек Жұбатқанұлы  жалғастырып, спорт жұлдыздары журналы редакция алқасының шешімімен Қазақстан Республикасында дене шынықтыру мен спортты дамытуға қосқан үлесі үшін медалімен Мақсат Сқақовты, патриоттық және азаматтық бел­сенділігі үшін медалімен Жандос Қоныспаевты, патриоттық және азаматтық белсенділігі үшін медалі­ мен Гүлзада Юсупованы марапатта­ды.

Жарысқа дзюдодан Қазақстан Республикасының спорт шебері, Қазақстан Республикасының дене шынықтыру мен спортты дамытуға қосқан үлесі үшін медалінің ие­гері, халықаралық дәрежедегі спорт төрешісі Қайрат Төлегенов бас төрешілік етті.

Жарыс қорытындысында «Жас батыр» спорт мектебі 6 алтын, 11 күміс, 13 қола медальмен 1-орынға, Грузия мемлекеті 5 алтын, 5 күміс, 1 қола медальмен 2­-орынға, Шығыс Қазақстан облысы 4 алтын, 2 күміс, 2 қола медальмен 3-­орынға ие болды.

Үміт ЖӘЛЕКЕ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.