Азия чемпионы Бауыржан Нарбаев бейнеуліктермен кездесті

©

Жақында Абай орта мектебінде Бейнеуден шыққан Азия және Европа чемпионы Бауыржан Нарбаевпен кездесу  өтті.

Елбасы Н.Ә.Назарбаевтың «Болашаққа бағдар: рухани жаңғыру» атты  мақаласынан туындайтын «Туған жерге тағзым» бағдарламасы шеңберінде, сонымен қатар «Денсаулық  күні» орай  аудандық  мәдениет, дене тәрбиесі және спорт бөлімімен Абай орта мектебі бірлесіп ұйымдастырған бұл шараға мектеп оқушылары, спортшы жастар, Бейнеу политехникалық колледжінің студенттері қатысты.

Бұл кездесуді ашып, жүргізген мектеп директорының бейіндік оқу жөніндегі орынбасары Сұлтан Тілеков жас чемпион Бауыржан Нарбаевтың осы мектепте оқып, үлкен спортқа алғашқы  қадамын осы мектептен бастағанын тілге тиек етіп, оның  спорттық жетістіктерінен деректер келтіріп, мәлімет берді.

Содан соң жерлесіміз Бауыржан спортта халықаралық деңгейдегі жетістіктерін паш етіп, алған  медальдарымен таныстырды. Спорттағы алдына қойған  мақсаттары жайлы әңгімеледі. Жарыстарда қарсыластарымен кездесу кезінде өзіне қиын соққан сәттерді еске түсіріп, жеңіске жету  оңай  шаруа емес екендігін, ол үзбей жаттығу мен ерекше дайындықты және  жаттықтырушының талаптарын бұлжытпай  орындауды талап ететін ауыр жол екендігін айтып, жас спортшылардың қызығушылығын тудырған  сұрақтарға жауап қайтарды. Қазіргі таңда Республикалық жарыстарға, соның ішінде Әлем чемпионатына қызу дайындалып жатқанын жеткізді.

Кездесуде сөз сөйлеген Бауыржанның алғашқы жаттықтырушыларының бірі қазір халықаралық дәрежедегі төреші Талғат Есекенов, Бауыржан жайлы айта келіп, Бейнеу топырағында туып, спортта жетістікке жетіп жүрген спортшыларды атады.

- Дзю-до спорты бойынша Маңғыстау спортшыларының республикада алдыңғы қатарда. Әлем чемпионатына қатысатын 7 спортшының 4-уі - Маңғыстау спортшылары, – деп айтты.

Сондай-ақ сөз кезігінде аудандық мәдениет, дене тәрбиесі және спорт бөлімінің басшысы Ж. Мырзабеков үлкен жарыстарға дайындалып жүрседе алтын уақытын бөліп, жерлестерімен кездесуге келіп, жеңістерінің қуанышын бөліскен Бауыржанға алғыс айтып, чемпиондық жеңіс тұғырларынан көріне беруіне тілектестік  білдірді.

Кездесуге келген көпшілікке Бауыржанның халықаралық деңгейдегі жарыстардағы жеңістерін паш еткен бейнероликтер көрсетілді.

Шара соңында жерлес спортшыға  мектеп әкімшілігінің атынан «орамал тон болмайды, жол болады» деген ниетпен ескерткішке кітап сыйға тартылып, Бауыржанның жетістіктерін паш ететін «Спортшы бұрышын» ұйымдастыру жоспарланып отырғаны айтылды. Жиналғандар чемпионмен ескерткіш суретке  түстуді  де қалыс  қалдырған  жоқ.

Кәрісбай ӘДІЛ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.