Maqamsaz.kz сайты іске қосылды

«Мақамы мәшһүр Маңғыстау» деп аталған жоба авторлары бұл туралы облыстық қоғамдық коммуникациялар орталығында өткен баспасөз брифингінде бөлісті, - деп хабарлайды mangystaumedia.kz сайты.

Маңғыстау өңірінің дәстүрлі музыкалық мұраларын көпшілікке жеткізетін жоба «Рухани жаңғыру» бағдарламасы аясында жүзеге асып отыр. Репертуарын құру мен IOS және Android платформаларына арналған мобильді қосымшасы 2 жылда жасалған.

Маңғыстау облысының мәдениет, тілдерді дамыту және архив ісі басқармасының тапсырысымен құрылған сайт репертуарына 180 шығарма енген.

«Репертуардағы шығармалардың саны 200-ге дейін жеткізіліп, жыл сайын толықтырылатын болады. Бұл сайттың бір ерекшелігі - шығармалардың авторы, орындаушылары туралы толық мәлімет беріледі. Сондай-ақ әр туындының жарыққа тарихы мен нотасы орналастырылған» - дейді жоба авторы Сұлтанбек Құдайберген.

Мақамы мәшһүр Маңғыстау әуендерін сайттан не мобильді қосымшадан тыңдап, нота арқылы үйренуге болады. Аталған жобада 50 автор, 60 орындаушы қамтылған.

Осы ретте жоба авторлары дәстүрлі музыканы нотаға түсіруге машықтанған мамандар - маңғыстаулық дәулескер күйшілер Айтберген Жаңбыршы, Айдарбек Оңайбаев, Жұмабек Қадырқұловтарға зор алғысын білдіреді.

Жоба авторлары алдағы уақытта маңғыстаулық өнерпаздардың жыршылық-орындаушылық шеберлігі туралы оқу-әдістемелік құрал шығаруды қолға алмақшы.

Бұл бағыттағы жұмыстар аяқталған соң жыршылар мектебін құрып, жоғарыда сөз болған оқу-әдістемелік құрал арқылы өскелең ұрпаққа рухани тәрбие беру шаралары жоспарда тұр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.