Жаңаөзендіктер Ғ.Мүсірепов театрын қарсы алды

Бейсенбіде Ғ.Мүсірепов атындағы қазақ мемлекеттік академиялық балалар және жасөспірімдер театрының әртістері Жаңаөзенге ат басын тіреді. Гастрольдік сапармен келген өнер ұжымын қала жұртшылығы ыстық ықыласпен қарсы алды.

Мәдениет және тілдерді дамыту бөлімінің басшысы Ұлбазар Орынбаева ұлттық және әлемдік туындыларды халыққа кеңінен ұсынып жүрген шоқтығы биік театр ұжымының Жаңаөзендегі сапарына сәттілік тілей отырып, қала әкімі Әділбек Дауылбаевтың атынан Алғыс хат табыс етті.

- Біздерге көрсеткен құрметтеріңіз, ақ ниеттеріңіз үшін алғысымыз шексіз. 50 жылдық мерейтойларыңыз құтты болсын! Әрқашан сіздердің жақсылықтарыңызға тілеулес болып жүреміз. Көркейіп, дами беріңіздер! - деп Ғ.Мүсірепов театрының әртісі, Қазақстанның еңбек сіңірген қайраткері Шолпан Сіргебаева жүрекжарды тілегін білдірді.

Сондай-ақ, сөз алған белгілі театр және кино әртісі Әсет Иманғалиев:

- Қасиетті Маңғыстау жеріне сапарымызды Ақтау қаласынан бастадық. Репертуарымыздағы ең озық деген туындыларымызды алып келдік. Алғашқы қойылым бүлдіршіндерге арналған «Әріптер әлеміне саяхат» атты танымдық ертегісімен басталмақ, - деді.

 Бұдан бөлек театр әртістерімен 20, 21 қыркүйек күндері қала халқының назарына «Енелер мен келіндер» комедиясы және ақиық ақын Мұқағали Мақатаевтың өлеңдерімен өрілген «Мен ұмытылмаймын» лирикалық драмасы сахналанбақ.

Айжан НАСЫРОВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.