Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
©
Ұлттық дәстүрдің қаймағы бұзылмаған Маңғыстау өңірінде Ұлыстың ұлы күні наурыздың 14-нен басталды. Амалмен қатар Жаңаөзен қаласының 50 жылдық мерейтойының шымылдығын қоса ашқан ұлық мейрам апта бойы қаланың әр аумағында тойланып келеді. Кезекті той Ұлыстың ұлы күнінде Теңге ауылында өтті.
Таңғы сағат 9-дан ауылдың мәдениет үйі алдына жиылған жұрттың қарасы аз емес. Мерекеге арнап қалалық Ауған соғысы ардагерлері қоғамдық бірлестігі, «Атамұра» мәдениет үйі және «Tenge oil and gas» мекемелері тіккен киіз үйлерді аралаған жұртшылық наурыз көжеден де дәм татты.
Жаңаөзен қаласының әкімі Әділбек Дауылбаев бастаған қала активінің құттықтауларынан кейін мереке «Атамұра» мәдениет үйі дайындаған концерттік бағдарламамен жалғасты.
https://youtu.be/QwDTfyJt45QҚар еріп, көктем келіп, табиғаттың бусанып, қылтиып көктің шыққаны кішкентай қыздардың орындауындағы би композициясымен әдемі суреттелді. Олардың ізін ортаға қыстан аман шыққан жұрттың бір-бірімен қауқылдасып көрісуін бейнелеген театрландырылған көрініс жалғады. Қазақта ежелден келе жатқан «Қазаның ортаймасын» деген жақсы тілек бар. Көріністегі тоқшылықтың, береке-бірліктің нышаны ретінде ортаға әкелінген тайқазан, қыз бен жігіт айтысы, күмбірлете тартылған күйдің фонындағы қазақша күрес ойындары керемет жарасым тапты. Ұл балаға арнап жасалатын қазақи салт «Ашамайға мінгізу» көрсетіліп, Қызыр ата бата берді. Кішкентай қыздардан құралған «Інжу» би ансамблінің «Ерке қызы» да халықты ерекше сүйсінтті.
https://youtu.be/FMcVfWzp-30Теңге ауылының тұрғыны, №11 орта мектептің ағылшын тілі пәні мұғалімі Бибігүл Сабитаева:
- Бүгін ауылымызда ұлан-асыр той болып жатыр. Амал құтты болсын, Наурыз оң болсын! Қазағымның осындай ұлттық мерекелері таусылмасын. Барша қазақ еліне бірлік пен молшылық тілеймін. Бір аптадан бері Наурыз тойын тойлап келеміз. Өте қуаныштымыз. Амалдан амалға бас аман, бауырымыз бүтінде жете берейік, - деп өзінің жүрекжарды тілегін жеткізді.
Теңге ауылынан бастау алған бұл күнгі той Рахат, Қызылсай ауылдары мен қала орталығында жалғасты. Жергілікті өнерпаздар концерт қойып, жәрмеңкелер ұйымдастырылды.
Айжан НАСЫРОВА
[gallery td_select_gallery_slide="slide" ids="50442,50441,50440"]
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.