Білім ұясының сақшысы

©

«Кітап маған тақтан да қымбат» деп ағылшын драматургы У.Шекспир айтқандай, кітап - адамзаттың ең үлкен қазынасы. Ал орыстың ұлы жазушысы Л.Толстой болса, «жақсы кітап – ақылды адамның әңгімесімен бірдей» деген. Расымен де, кітап - біздің рухани досымыз, үнсіз ұстазымыз, ақылшымыз! Кітап арқылы адам рухани дамып, білім нұрына малынады. Және оның маңызын кітапты тап-тұйнақтай сақтап, тазалығын, бүтіндігін тексеретін, жастарды білімге тартып, маңызын түсіндіретін – кітапханашылардан артық ешкім білмес...

Облыстық дарынды балаларға арналған қазақ-түрік мамандандырылған мектеп-лицей-интернатының кітапханасында кітап қоры мол, әмбебап еңбектер жетерлік. Өңірдің озық білім ордасында оқушыларды қабылдап, кітаптармен қамтамасыз ететін кітапханашы әрдайым жылы шырайлы, көңілі жайдары. Білім ұясына айналған кітапхана ішінде тыныштық пен сабырлықтың, білімдарлық пен кәсібиліктің иесі – кітапханашы Адия Капизова қызмет етеді. Оның кітапқа деген сүйіспеншілігі, мамандығына деген адалдығы арқасында кітапхана іші рухани байлыққа толып, ізденіс үстіндегі жастар қажетті оқулығын тауып, білім нәрімен сусындайды.

Адия Мақсотқызы 1962 жылы Атырау облысы, Құрманғазы ауданы, Сүйіндік совхозында дүниеге келген. Білім шамшырағын жаққан ұстаздар отбасынан шыққан ол ғажайып ертегілерді, қызықты әңгімелерді оқып, әдебиет әлеміне махаббаты ерте оянады. Балалық шағында білім тұңғиығына бойлаған бойжеткен кітапханада қызмет етуді армандайды. 1979 жылы мектепті тәмамдаған Адия апай арман қуып, Алматы қаласына аттанады. Жастықтың жалынды шағында Алматының белгілі Қазақ қыздар педагогикалық институтының «кітапхана-библиограф» мамандығына түседі.

-Рухани байлықтың орталығы – кітапханада қызмет ету арманым кішкентай кезімнен қалыптасқан тәрізді. Себебі, қиял-ғажайып әлемге жетелейтін ертегілерді сүйіп оқитынмын. Жасөспірім болған кезде де әдебиет саласындағы классик ақын-жазушылардың тамаша туындыларын іздеп, бас алмай оқып жүрдім. Әке-шешем мұғалімдер болғандықтан, білім алуға, оқуға құштар болдым. Кітапхана мамандығына түскенімде қуанышымда шек болмады. Жоғары оқу орнына түскен кезде де Алматының ірі кітапханаларына бас сұғып, ауылда таба алмаған кітаптарды тауып, мәз болатынмын. Ол кезде қазақтың әдеби көркем кітаптардың жоқтың қасы. Тапқанымызды алтындай бағалап, бір-бірімізбен ауыстырып, бөлісетінбіз,-деп еске алады студенттік шағын Адия апай.

Институтты 1983 жылы жақсы бағалармен аяқтаған Адия апай Оңтүстік Қазақстан облысы, Шардара қаласының жігіті Әжібай Мамыровпен шаңырақ көтеріп, сол жердің қалалық кітапханасында еңбек жолын бастайды. Қызметін абыроймен атқарып, еңбекқорлығымен, тиянақтылығымен көзге түседі. Жүрек қалауымен таңдаған мамандығын шексіз сүйеді. 2004 жылы отбасы жағдайымен киелі Маңғыстау өңіріне қоныс аударып, Ақтау қалалық кітапханада, сосын №14 орта мектептің кітапхана меңгерушісі қызмет етеді. Облыстық дарынды балаларға арналған қазақ-түрік мамандандырылған мектеп-лицейіне 2008 жылы жұмысқа орналасады. Кәсібилігін ұштап, білімін толықтырудан Адия апай бір сәтке шаршамайды. Балалардың білім алуына мүмкіндік жасап, кітапханада жастарға өнеге болар тағылымды шаралар көп өткізеді. Өңірдің танымал тұлғаларымен кездесулер өткізіп, ұйымдастырушылық қабілетін, жан-жақтылығын байқатты. Еліміздің ұлық мейрамы – Тәуелсіздіктің 25 жылдығына орай «Егеменді елдің жемісті 25 жылы» тақырыбында өткен мәдени шарасы да көпшілік көңілінен шықты.

Өмірін білім бұлағы – кітапқа арнаған Адия апайдың еңбегі елеусіз қалған жоқ. Мектеп директорынан, облыстық білім басқармасының алғыс хаттарымен марапатталған, облыстық, республикалық сертификаттарға ие болған білімді қызметкердің толағай табыстары көп болсын деп тілейміз!

Х.ОРЫНБАЙҚЫЗЫ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.